نمائندہ ایکسپریس نیوز ندیم گرگناڑی کا زخمی بیٹا بھی چل بسا

ڈیرہ مراد میں پولیس اہلکار کی خود کشی،مستونگ میں تحصیلدار،حب میں تاجر زخمی فوٹو: فائل

---

خضدار میں ایکسپریس نیوز کے نمائندے ندیم گرگناڑی کا فائرنگ سے زخمی ہونے والا دوسرا بیٹا بھی جاں بحق ہوگیا۔

ڈیرہ مرادجمالی میں پولیس اہلکار نے خودکشی کرلی، مستونگ میں لیویز اہلکار نے فائرنگ کرکے تحصیلدار جبکہ حب میں تاجر کو زخمی کردیاگیا ،پولیس کے مطابق خضدار میں جمعرات کو نامعلوم افراد کی فائرنگ سے ایکسپریس نیوز اور روزنامہ سینچری ایکسپریس کے نمائندے ندیم گرگناڑی کا ایک بیٹا سراج احمد جاں بحق جبکہ منظور احمد زخمی ہوگیا، جمعہ کو منظور احمد بھی ہسپتال میں زخموں کی تاب نہ لاتے ہوئے جاں بحق ہوگیا جس کی نعش ورثاء کے حوالے کردی گئی۔

ڈیرہ مرادجمالی میں گھریلو ناچاقی پر وارڈ نمبر7کے رہائشی پولیس اہلکار نذیر احمد نے گلے میں پھندہ ڈال کر خودکشی کرلی متوفی دوبچوں کا باپ بتایاجاتاہے پولیس نے ضروری کارروائی کے بعد نعش ورثاء کے حوالے کردی، مستونگ سے نمائندے کے مطابق لیویز اہلکار خلیل احمد نے تنخواہ نہ ملنے پر فائرنگ کرکے تحصیلدار بلند خان کو زخمی کردیا جنہیں اسپتال منتقل کردیاگیا، بتایاگیا ہے کہ لیویز اہلکار کی تنخواہ غیر حاضری کی وجہ سے بند تھی لیویزمزید کارروائی کررہی ہے، علاوہ ازیں حب میں مویشی منڈی میں ایک بیوپاری کو لوٹنے کی کوشش کے دوران فائرنگ کرکے زخمی کردیاگیا جسے کراچی کے اسپتال منتقل کیاگیاہے۔