وزیراعظم کے مشیر برائے پیٹرولیم ڈاکٹرعاصم نے کہا ہے کہ سی این جی قیمت میں حالیہ کمی حتمی نہیں،عید الضحٰی کے بعد تمام اسٹیک ہولڈرز کی مشاورت کے بعد نئی قیمت مقرر کی جائے گی۔
سرکاری نشریاتی ادارے کو انٹرویو دیتے ہوئے مشیر پیٹرولیم نے کہا کہ سپریم کورٹ کے فیصلے پر تفصیلی جائزے کے لئے آئندہ منگل کو اجلاس طلب کیا گیا ہے جس میں تمام اسٹیک ہولڈرز شرکت کریں گے۔ ان کہنا تھا کہ حکومت سی این جی کی قیمت پیٹرول کے ساتھ منسلک کرنے سے متعلق سپریم کورٹ کے فیصلے پر نظر ثانی درخواست دائر کرنے کے لئے غور کررہی ہے کیونکہ ملک سی این جی کو سستے ایندھن کے طور پر استعمال کرنے کا متحمل نہیں ہوسکتا۔
مشیر پیٹرلیم کا کہنا تھا کہ آٓٓپریٹنگ کوسٹ کے خاتمے سے سی این جی کی قیمتیں کم ہوں گی کیونکہ اس سے قبل سی این جی اسٹیشن مالکان بھاری منافع کماتےآئے ہیں۔ اسٹیشن مالکان کو چاہیئے کہ وہ عوام کی مشکلات نہ بڑھائیں اور عید کے موقع پر سی این جی کی فراہمی کو ممکن بنائیں۔