وزیراعظم نواز شریف کی مہمان نوازی پر ان کا بے حد شکرگزار ہوں نریندر مودی

بھارتی وزیراعظم نریندرمودی کا کہنا ہے کہ جس طرح سے وزیراعظم نواز شریف نے گرم جوشی سے استقبال کیا اس پر وہ بے حد مشکور ہیں۔

بھارتی وزیراعظم نریندرمودی نے مختصر دورہ لاہور پر اپنے رد عمل کا اظہار مسرت کے ساتھ کیا جس میں سماجی رابطے کی ویب سائٹ ٹوئٹر پر اپنے بیان میں نریندر مودی نے کہا کہ وہ وزیراعظم نواز شریف کی مہمان نوازی پر ان کے بے حد مشکور ہیں، وزیراعظم نواز شریف نے جس طرح گرم جوشی سے لاہور ائیرپورٹ پر استقبال اورالوداع کیا اس سے وہ بے حد متاثر ہوئے۔

نریندر مودی کا کہنا تھا کہ انہوں نے نواز شریف اور ان کے خاندان کے ساتھ ان کے گھرمیں نہایت خوشگوارشام گزاری جب کہ نوازشریف کی سالگرہ اور ان کی نواسی کی شادی نے مزہ دوبالا کردیا۔

بھارتی وزیراعظم نے کہا کہ نوازشریف کا اٹل بہاری واجپائی سے دلی لگاؤ ہے جب کہ ملاقات میں نوازشریف نے اٹل بہاری واجپائی سے کی گئی باتوں کے بارے میں بھی بتایا اور اپنا سلام بھی مجھے ان تک پہنچانے کے لیے کہا ہے۔