حج بیت اللہ کی سعادت کے بعد حاجیوں کی وطن واپسی کا سلسلہ شروع ہوگیا ہے۔ اس سلسلے میں نجی پرواز کے ذریعے 100 سے زائد حاجی وطن واپس پہنچ گئے۔
پاکستان سے اس سال ایک لاکھ 25 ہزارسے زائد عازمین حج بیت اللہ کی سعادت کے لئے سعودی عرب گئے تھے۔ حج کی سعادت حاصل کرنے کے بعد 100 سے زائد حاجیوں کو لے کر غیر ملکی ائیر لائن کی پرواز لاہور کے علامہ اقبال انٹرنیشنل ائیرپورٹ پہنچی۔ وطن واپسی پر عزیز و اقارب کی جانب سے حاجیوں کا پر تپاک استقبال کیا گیا۔ اس موقع پر رقت آمیز مناظر بھی دیکھنے کو ملے۔
حاجیوں کا کہنا تھا کہ سعودی عرب میں کئے گئے انتظامات کافی بہتر تھے تاہم پاکستانیوں میں نظم وضبط کا فقدان نظر آیا۔