کراچی کے مختلف علاقوں میں پولیس مقابلے 5 ملزمان ہلاک

ہلاک ملزمان کا تعلق لیاری گینگ وار کے عزیر بلوچ اور شیراز کامریڈ گروپ سے ہے، ایس ایس پی سٹی فوٹو: فائل

---

KARACHI: شہر کے مختلف علاقوں موچکو ، مچھرکالونی اور گزری میں پولیس مقابلوں کے دوران 5 ملزمان ہلاک اور ایک زخمی ہوگیا۔

ایکسپریس نیوز کے مطابق ایس ایس پی سٹی فدا حسین کا کہنا ہے کہ کراچی کے علاقے مچھر کالونی میں پولیس نے خفیہ اطلاع پر چھاپہ مارا تو ملزمان نے فائرنگ کردی جس کے بعد جوابی کارروائی کے نتیجے میں 2 ملزمان ہلاک ہوگئے جب کہ ملزمان کے قبضے سے اسلحہ بھی برآمد کیا گیا ہے اور ملزمان کا تعلق لیاری گینگ وار کے عزیربلوچ گروپ سے تھا۔

ایس ایس پی کے مطابق موچکو کے علاقے میں پولیس مقابلے کے دوران 2 ملزمان ہلاک ہوئے جن کے قبضہ سے اسلحہ برآمد ہوا جب کہ ہلاک ملزموں میں 12 افراد کا قاتل بھی شامل ہے اور ملزمان کا تعلق شیراز کامریڈ گروپ سے ہے۔ اسی طرح گزری کے علاقے میں 2 ڈاکو شہریوں کو لوٹنے میں مصروف تھے کہ پولیس نے موقع پر پہنچ کر دونوں کو گرفتار کرنے کی کوشش کی تاہم انہوں نے فائرنگ کردی جس پر جوابی فائرنگ کے نتیجے میں ایک ملزم ہلاک اور دوسرے کو زخمی حالت میں گرفتار کرلیا گیا۔