وہاڑی میں ٹرک اور کار کے درمیان تصادم 4افراد جاں بحق

حادثہ کار ڈرائیور کو نیند آنے کی وجہ سے پیش آیا، ریسکیو حکام فوٹو: فائل

---

لُڈن روڈ پر ٹرک اور مخالف سمت سے آنے والی کار کے درمیان تصادم کے نتیجے میں 4افراد جاں بحق جب کہ متعدد زخمی ہوگئے۔

ایکسپریس نیوز کے مطابق وہاڑی میں لُڈن روڈ پر کوٹ والی پل کے قریب تیز رفتار کار مخالف سمت سے آنے والے ٹرک سے ٹکراگئی۔ حادثے میں 4 افراد موقع پر ہی جاں بحق ہوگئے۔ریسکیو 1122 نے لاشیں اور زخمیوں کو ڈسٹرکٹ ہیڈ کوارٹروہاڑی اسپتال منتقل کردیا، جہاں جاں بحق افراد کی شناخت بہاول نگر کے علاقے فقیر والی کے رہائشی مختار احمد، بیوی جمیلہ بی بی، بیٹی عاصمہ اور ان کے ڈرائیور کی حیثیت سے ہوئی ہے۔ ریسکیو اہلکاروں کا کہنا ہے کہ حادثہ کار کے ڈرائیور کو نیند آنے کی وجہ سے پیش آیا ہے۔

وزیراعلیٰ پنجاب شہباز شریف نے ٹریفک حادثے کے نتیجے میں قیمتی انسانی جانوں کے ضیاع پر دکھ اور افسوس کا اظہار کرتے ہوئے زخمیوں ہونے والے افراد کو بہترین طبی سہولتیں فراہم کرنے کی ہدایت کردی۔