لاہور میں دہشت گردی کی بڑی سازش ناکام 10 کلو وزنی بم برآمد

پولیس نے ہنجروال میں نہر کنارے اوور ہیڈ پل کے قریب 10 کلو وزنی بم ناکارہ بناکر دہشت گردی کی بڑی سازش ناکام بنادی۔

ایکسپریس نیوز کے مطابق لاہور کے علاقے ہنجروال میں لوگوں نے نہر کنارے اوور ہیڈ پل پر مشکوک بالٹی کی موجودگی پر پولیس کو اطلاع دی ۔ گشت پر مامور پولیس ٹیم نے موقع پر پہنچ کر فوری طور پر بم ڈسپوزل اسکواڈ کو طلب کرلیا۔ جس نے بم کو ناکارہ بنادیا۔ جس کے بعد پولیس کی بھاری نفری نے علاقے کو گھیرے میں لے کر سرچ آپریشن شروع کردیا تاہم اب تک کسی قسم کی گرفتاری کی تصدیق نہیں کی گئی ۔


بم ڈسپوزل اسکواڈ کا کہنا تھا کہ بالٹی میں موجود بم دیسی ساختہ اور اس کا وزن 10 کلو گرام سے زائد تھا اور اسے مزید تباہ کن بنانے کے لئے اس میں بڑی مقدار میں بال بیئرنگ رکھے گئے تھے۔

ڈی آئی جی آپریشنز لاہور نے میڈیا سے بات کرتے ہوئے کہا کہ بارودی مواد کو ریموٹ کنٹرول کی مدد سے اڑایا جانا تھا اور اس کا مقصد ممکنہ طور پر سیاسی اور پولیس افسران کو نشانہ بنایا جانا تھا کیونکہ اتنے زیادہ بارودی مواد کے ذریعے کئی گاڑیوں کو ایک ساتھ نشانہ بنایا جاسکتا ہے ۔