تھرپارکرمیں وبائی امراض سے اموات کا سلسلہ جاری مزید 2 بچے دم توڑ گئے

رواں ماہ کے دوران تھرپارکر میں اب تک 17 بچے وبائی امراض کے باعث دم توڑ چکے ہیں۔ فوٹو: فائل

---

تھرپارکر میں وبائی امراض کے باعث اموات کا سلسلہ جاری ہے اور آج بھی مزید 2 بچے دم توڑ گئے ہیں۔

ایکسپریس نیوز کے مطابق سول اسپتال مٹھی میں وبائی امراض کے باعث زیر علاج مزید ایک نومولود بچہ دم توڑ گیا جب کہ تھرپارکر کی تحصیل اسلام کوٹ کے گاوں پراگو میں بھی 15 روز کا ایک بچہ انتقال کر گیا۔

واضح رہے کہ گزشتہ روز پاکستان پیپلز پارٹی کے چیرمین بلاول بھٹو زرداری نے تھرپارکر میں ایک ماہ کے دوران وبائی امراض کے باعث 45 بچوں کی اموات کا نوٹس لیا تھا جب کہ مشیر اطلاعات سندھ مولا بخش چانڈیو نے تھرپارکر پہنچنے کی ہدایت کی تھی۔ رواں ماہ کے دوران تھرپارکر میں اب تک 17 بچے وبائی امراض کے باعث دم توڑ چکے ہیں۔