دبنگ خان کی فلم ’’سلطان‘‘ میں مدمقابل اداکارہ کیلیے قرعہ فال انوشکا شرما کے نام نکل آیا

دونوں اداکاروں پہلی بار ایک ساتھ کسی بھی فلم میں جلوہ گر ہوں گے، فوٹو:بشکریہ انوشکا شرما ٹوئٹر اکاؤنٹ

---

بالی ووڈ کے دبنگ سپر اسٹار سلمان خان کی نئی آنے والی فلم ''سلطان'' میں مرکزی کردار کے لیے قرعہ فال اداکارہ انوشکا شرما کے نام نکل گیا ہے جس کے بعد اب دونوں اداکار پہلی بار کسی بھی فلم میں ایک ساتھ جلوہ گر ہوں گے۔

یش راج بینر تلے بننے والی فلم''سلطان'' میں سلمان خان کے مدمقابل اداکارہ کے لیے کئی اداکاراؤں کے نام لیے جارہے تھے جس میں اداکارہ دپیکا پڈوکون، پرینیتی چوپڑا، کنگنا رناوت سمیت متعدد اداکارائیں شامل تھیں جب کہ فلم کے پروڈیوسر اداکارہ پرینیتی چوپڑا اور سلمان خان اداکارہ کیریتی سنون کو فلم میں کاسٹ کرانا چاہتے تھے تاہم اب فلم میں اداکارہ انوشکا شرما کو کاسٹ کرلیا گیا ہے۔

میڈیا رپورٹس کے مطابق فلم ''سلطان'' میں سلمان خان کے مدمقابل اداکارہ کے لیے قرعہ فال انوشکا شرما کے نام نکلا ہے جس کے بعد اب وہ فلم میں مرکزی کردارادا کریں گی جب کہ فلم میں اداکارہ ریسلر کا کردار نبھائیں گی جس کے لیے انہوں نے باقاعدہ تیاری بھی شروع کردی ہے۔

👊🏼SULTAN👊🏼 pic.twitter.com/q54PWau1YG

— Anushka Sharma (@AnushkaSharma) January 8, 2016

دوسری جانب بالی ووڈ اداکارہ انوشکا شرما نے بھی سماجی رابطے کی ویب سائٹ ٹوئٹر پر سلمان خان کے ساتھ تصویر شیئر کرکے فلم ''سلطان''میں کاسٹ کرنے پر خوشی کا اظہار کیا ہے جب کہ دونوں اداکاروں پہلی بار ایک ساتھ کسی بھی فلم میں جلوہ گر ہوں گے۔

واضح رہے کہ سلمان خان فلم ''سلطان'' میں باکسر کا کردار نبھائیں گے اور فلم رواں سال عید کے موقع پر ریلیز کی جائے گی۔