شردھا کپورکا کچھ نیا کرنے کیلئے 37 منزلہ عمارت سے چھلانگ لگانے کا خطرناک اسٹنٹ

خطرناک اسٹنٹ کرنے میں لطف آتا ہے اسی لیے اب فلموں میں بھی خود اسٹنٹ کرنے کے لیے بیتاب رہتی ہوں،اداکارہ

ویب ڈیسک January 10, 2016

خطرناک اسٹنٹ کرنے میں لطف آتا ہے اسی لیے اب فلموں میں بھی خود اسٹنٹ کرنے کے لیے بیتاب رہتی ہوں،اداکارہ۔ فوٹو: ٹوئٹراکاؤنٹ

بالی ووڈ اداکارہ شردھا کپور خطروں کی کھلاڑی بن گئیں اور کچھ نیا کرنے کے لئے انہوں نے خطرناک اسٹنٹ کیا ہے۔

بالی ووڈ اداکارہ شردھا کپور نے فلمی کیرئیر کا آغاز 2010 میں ریلیز ہونے والی فلم ''تین پتی'' سے کیا لیکن انہیں شہرت 2013 میں ریلیز ہونے والی فلم''عاشقی 2'' سے ملی جس کے بعد انہوں نے پیچھے مڑکر نہیں دیکھا اور 2 بلاک بسٹر فلموں میں اداکاری کے جوہر دکھائے جب کہ فلموں میں شہرت انہیں اپنے رومانوی کردار کے باعث ملی تاہم اب وہ اپنی نئی آنے والی فلموں میں خطرناک اسٹنٹ کرتی نظر آئیں گی۔

بالی ووڈ اداکارہ نےایک اشتہار کے لیے ممبئی کی 37 منزلہ عمارت سے چھلانگ لگانے کا خطرناک اسٹنٹ بغیر کسی مشکل کے سرانجام دے کر سب کو حیران کردیا یہی نہیں انہوں نے اپنی نئی آنے والی فلم ''باغی'' کے لیے بھی کچھ ایسے ہی خطرناک اسٹنٹ کیے ہیں جب کہ اس موقع پراداکارہ شردھا کپور کا کہنا تھا کہ خطرناک اسٹنٹ کرنے میں لطف آتا ہے اسی لیے اب فلموں میں بھی خود اسٹنٹ کرنے کے لیے بیتاب رہتی ہوں۔