اسرائیل کے دفاع کے لئے اوباما کو ایک ارب ڈالر کی پیشکش کا انکشاف

شیلڈن اڈلسن نے 2013 میں آئرن ڈوم اینٹی میزائل سسٹم کے لئے اوباما کو ایک ارب ڈالر کی پیش کش کی تھی۔ فوٹو: فائل

---

لاہور: یہودی امریکن ارب پتی اور ریپبلکن رہنما شیلڈن اڈلسن کی جانب سے امریکی صدر براک اوباما کو اسرائیل کے دفاع کو مضبوط بنانے کے لئے ایک ارب ڈالر کی پیش کش کا انکشاف ہوا ہے۔

اسرائیلی اخبار ٹائمز آف اسرائیل نے امریکی صدر براک اوباما کے چیف آف اسٹاف ڈینس مک ڈونف کے کوائف کے حوالے سے انکشاف کیا ہے کہ 2013 میں کانگریس نے پینٹا گون اسرائیل کے لئے مشترکہ آئرن ڈوم سسٹم کی فنڈنگ کے حوالے سے ایک بل منظور کیا جس کے فوراً بعد لاس ویگاس سے تعلق رکھنے والے ارب پتی شیلڈن ایڈلسن نے اس وقت سینیٹ میں اقلیتی رہنما ہنری ریڈ سے فون پر بات کی اور کہا کہ اسرائیل کے آئرن ڈوم اینٹی میزائل سسٹم کے لئے ایک ارب ڈالر اکیلا دینے کے لئے تیار ہوں، میرا یہ پیغام وائٹ ہاؤس تک پہنچا دیں۔

اسرائیلی اخباز نے مزید لکھا ہے کہ صدر اوباما نے اس پیغام کے جواب میں کہا کہ میں نہیں سمجھتا کہ میزائل کے لئے پرائیویٹ فنڈنگ اچھی مثال ہو گی، اوباما نے ہنری ریڈ سے کہا کہ شیلڈن اڈلسن کی آفر کو رد کرتے ہوئے ان کا شکریہ ادا کردیں جس کے بعد یہ پیش کش مردہ ہو گئی۔