خامیوں سے بھرے خود کار ٹیکس نظام کو ختم کر نے پر غور

4 ماہ گزرنے کے باوجود آئی آر آئی ایس کی خامیاں دور نہیں کی جا سکیں جس سے انکم ٹیکس آڈٹ کا عمل رکا ہوا ہے

Irshad Ansari January 13, 2016

4 ماہ گزرنے کے باوجود آئی آر آئی ایس کی خامیاں دور نہیں کی جا سکیں جس سے انکم ٹیکس آڈٹ کا عمل رکا ہوا ہے فوٹو: فائل

JALALABAD: فیڈرل بورڈ آف ریونیو(ایف بی آر) نے خودکار ٹیکس نظام میں بڑے پیمانے پر خامیوں کے باعث آئی آر آئی ایس کو ختم کرکے انکم ٹیکس کے لیے بھی دوبارہ ٹیکس آڈٹ مانیٹرنگ سسٹم شروع کرنے کا جائزہ لینا شروع کردیا ہے۔

ایف بی آر کے ذرائع نے بتایا کہ ایف بی آر کی جانب سے انکم ٹیکس آڈٹ کے لیے منتخب کیے جانے والے ٹیکس دہندگان کا آڈٹ پراسیس آئی آر آئی ایس کے ذریعے ہونا تھا مگر4 ماہ سے زائد گزرنے کے باوجود آئی آر آئی ایس کی خامیاں دور نہیں کی جاسکیں اور ان نقائص کی وجہ سے ٹیکس دہندگان کے انکم ٹیکس آڈٹ کا عمل رکا ہوا ہے۔

اس حوالے سے 4 ماہ کے نتائج نہ ہونے کے برابر ہیں۔ واضح رہے کہ ان نقائص کے باعث ایف بی آر پاکستان ریونیو آٹومیشن لمیٹڈ (پرال)کو ٹیکس دہندگان کی جانب سے دستی بھجوائے جانے والے جوابات آئی آر آئی ایس میں اپ لوڈ کرنے کی پہلے ہی ہدایت کر چکا ہے مگر اس کے باوجود آڈٹ میں مسائل آرہے ہیں کیونکہ بہت سے ماڈیولز ہی آئی آر آئی ایس میں شامل نہیں۔

ذرائع کے مطابق آڈٹ پالیسی 2015 کے تحت 14 ستمبرکو ایف بی آر ہیڈکوارٹرز میں کمپیوٹرائزڈ قرعہ اندازی کے ذریعے ٹیکس ایئر2014 کے آڈٹ کے لیے 75ہزار 871 ٹیکس دہندگان منتخب کیے گئے تھے۔

ان میں انکم ٹیکس آڈٹ کے لیے منتخب ہونے والوں کا آڈٹ آئی آر آئی ایس کے ذریعے جبکہ سیلز ٹیکس اور فیڈرل ایکسائز ڈیوٹی کا آڈٹ پراسیس ٹیکس آڈٹ مانیٹرنگ سسٹم کے ذریعے کیا جانا ہے۔ دستاویز کے مطابق کارپوریٹ سیکٹر کے 1 ہزار954 ٹیکس دہندگان اور نان کارپوریٹ سیکٹر کے65 ہزار 439 افراد کو انکم ٹیکس آڈٹ کے لیے منتخب کیا گیا تھا۔