افغانستان میں پرتشدد واقعات میں 10 پولیس اہلکارسمیت 33 جنگجو ہلاک

سیکیورٹی فورسزکی زابل،ہلمند،قندوز،پکتیکا اورلوگرمیں کارروائیاں،14 عسکریت پسند زخمی6 کوگرفتارکیا گیا،افغان وزارت دفاع

این این آئی January 20, 2016

ارزگان میں4اہلکارساتھیوں کوہلاک کرکے طالبان سے جاملے،آسٹریلوی وزیراعظم کی تعینات فوجیوں سے ملاقات، مزید فوجی بھیجنے کااعلان :فوٹو:فائل

افغانستان کی سیکیورٹی فورسزنے مختلف کارروائیوںکے نتیجے میں 23 شدت پسندوں کو ہلاک 14 کو زخمی اور6 کوگرفتارکرنے کادعویٰ کیا ہے ۔

کابل میں افغان وزارت دفاع کی طرف سے جاری ہونیوالے ایک بیان میں کہا گیاکہ سیکیورٹی فورسزنے زابل، ہلمند، قندوز، پکتیکا اورلوگر میں کارروائیاں کیں اور بھاری مقدار میں اسلحہ و گولہ بارود برآمد کرنے کا دعویٰ بھی کیا ہے۔

آسٹریلیا نے مزید فوجی افغانستان بھیجنے کا اعلان کیا ہے۔ علاوہ ازیں ارزگان میں 4افغان پولیس اہلکاروںنے ساتھیوں پر حملہ کرکے 10 ہلاک کردیے اور اسلحے سمیت طالبان سے جا ملے۔افغان حکام کے مطابق ان پولیس اہلکاروں کی تلاش میں چھاپے مارے جارہے ہیں۔ دورہ کابل کے دوران آسٹریلیا کے وزیر اعظم نے افغانستان میں تعینات آسٹریلوی فوجیوں سے ملاقات کی اور ان سے خطاب میں اعلان کیا کہ ان کا ملک افغانستان میں اپنے فوجیوں کی تعدادبڑھانے جا رہا ہے۔

جس کے بعد افغانستان میں آسٹریلوی فوجیوں کی تعداد 270 ہو جائے گی۔غیرملکی خبررساں ادارے کے مطابق صوبہ ارزگان کے حکومتی ترجمان دوست محمد خان نایاب نے واقعے کی تصدیق کی ہے اور بتایا ہے کہ یہ واقعہ گزشتہ روز ارزگان کے جنوبی علاقے میں یہ واقع ایک چیک پوسٹ پر پیش آیا ۔اس واقعے کی ذمے داری ابھی تک کسی گروہ کی جانب سے قبول نہیں کی گئی ہے ۔گزشتہ سال ارزگان کے صوبائی پولیس چیف اور پھر ان کے جان نشین کو بھی افغان پولیس اہلکار وں نے قتل کر دیا تھا اور ان واقعات کی ذمے داری طالبان نے قبول کی تھی۔