چارسدہ یونیورسٹی پر حملے کے سہولت کار گرفتار کرلئےآئی جی خیبرپختونخوا

گرفتار ملزمان حملے کے سہولت کار ہیں اور حملے کے تانے بانے جہاں سے ملیں گے وہاں کارروائی ہوگی،ناصردرانی۔ فوٹو: اے پی

---

خیبرپختونخوا کے آئی جی ناصردرانی کا کہنا ہے کہ چارسدہ کی باچاخان یونیورسٹی پر حملہ کرنے والوں کے سہولت کاروں کو گرفتار کرلیا گیا ہے۔

باچا خان یونیورسٹی پر دہشت گردوں کے حملے میں زخمیوں کی عیادت کے بعد میڈیا سے بات کرتے ہوئے آئی جی خیبرپختونخوا ناصردرانی کا کہنا ہے کہ سانحہ کے بعد کارروائی کے دوران کچھ لوگوں کو گرفتار کیا گیا ہے جن سے تفتیش کی جارہی ہے اور تفتیش کے بعد انہیں میڈیا کے سامنے بھی لایا جائے گا۔ انہوں نے اعتراف کیا کہ گرفتار ملزمان حملے کے سہولت کار ہیں اور حملے کے تانے بانے جہاں سے ملیں گے وہاں کارروائی ہوگی۔

واضح رہے کہ گزشتہ روز چارسدہ کی باچا خان یونیورسٹی پر دہشت گردی کے حملے میں طلبا سمیت 20 افراد شہید اور 50 سے زائد زخمی ہوگئے تھے جب کہ جوابی کارروائی میں 4 حملہ آور بھی ہلاک کردیئے گئے تھے۔