’’ارتھ ٹو‘‘ میں شبانہ اعظمی کے کردار کو نبھانا مشکل کام ہے عظمیٰ حسن

میں نے ٹی وی اورتھیٹر پر بہت کام کیا اورکبھی سوچا بھی نہ تھا کہ کبھی فلم میں کام کروں گی، عظمیٰ حسن۔ فوٹو : فائل

---

معروف اداکارہ وماڈل عظمیٰ حسن نے کہا ہے کہ اپنے کیرئیر کی پہلی فلم میں شان جیسے وراسٹائل اداکار ، ہدایتکار اور شاندارانسان کے ساتھ کام کرنا اعزازکی بات ہے۔ شان سے ایکٹنگ ہی نہیں بلکہ ڈائریکشن کی تربیت بھی حاصل کررہی ہوں۔

فلم میں شبانہ اعظمی کے کردار کو نبھانا بہت مشکل ٹاسک ہے۔ ان خیالات کا اظہار عظمیٰ حسن نے گزشتہ روز ''ایکسپریس'' کوخصوصی انٹرویودیتے ہوئے کہا کہ میرا تعلق ٹی وی اورتھیٹر سے ہے۔ میں نے ٹی وی اورتھیٹر پر بہت کام کیا اورکبھی سوچا بھی نہ تھا کہ کبھی فلم میں کام کرونگی، یہی نہیں یہ بھی کبھی خیال نہیں آیا تھا کہ ایک دن مجھے سپراسٹارشان کے ساتھ کام کرنے کاموقع ملے گا ۔ یہ میری خوش قسمتی ہے کہ میں ''ارتھ ٹو'' میں ایک اہم کردارادا کررہی ہوں۔

فلم کی شوٹنگ کے دوران بہت سی مشکلات کا سامنا کرنا پڑا ، کیونکہ فلم اورٹی وی، تھیٹرمیں خاصا فرق ہے۔ شان نے بڑی رہنمائی کی اورمیں اچھا کام کرپارہی ہوں۔میں اپنے کیرئیرمیں بہت کچھ کرنا چاہتی ہوں۔ ٹی وی، تھیٹراورفلم کے شعبوں میں کام کرتی رہوں گی اوراس کے علاوہ تکنیکی شعبوں میں بھی قسمت آزماؤنگی۔ اس کی بڑی وجہ شان ہی ہیں جن کے کام کرنے کے اندازنے مجھے بہت متاثرکیا ہے۔ ان کودیکھ کرمجھے یوں محسوس ہوتا ہے کہ اس شعبے سے وابستہ ایک فنکارکوتمام تکنیکی کام بھی آنے چاہئیں، تاکہ وہ بہترانداز سے اپنا کام مکمل کرسکے۔

ایک سوال کے جواب میں عظمیٰ حسن نے بتایا کہ میں انڈیا میں تھیٹرمیں پرفارم کرچکی ہوں۔ جہاں تک بات بالی ووڈ فلموں میں کام کرنے کی ہے تو ضرورکام کرونگی ، لیکن ایسا کوئی کام نہیں کرونگی جس سے میرے وطن کی بدنامی ہو۔ کیونکہ مجھے پاکستانی ہونے پرفخر ہے اورمیرے لیے سب سے پہلا اپنا وطن ہے۔ انھوں نے کہا کہ مجھے کمرشل سینما میں کوئی دلچسپی نہیں۔ میں بالی وڈ کے وراسٹائل اداکارنصیرالدین شاہ، اوم پوری، شبانہ اعظمی اورودیا بالن کی طرح اپنی ایک منفرد پہچان بنانا چاہتی ہوں۔