وفاقی تعلیمی اداروں کو 33 اسلحہ لائسنس دینے کا فیصلہ

اسکولوں کی عمارتوں پر نگرانی کے لئے چیک پوسٹیں قائم کرنے اور تربیت یافتہ گارڈرکھنے کی بھی ہدایات بھی جاری کی گئی ہیں. فوٹو: فائل

---

ملک میں تعلیمی اداروں پر بڑھتے ہوئے دہشت گرد حملوں کے خدشات کے باعث وفاقی سرکاری تعلیمی اداروں کو 3،3 اسلحہ لائسنس دینے کا فیصلہ کیا گیا ہے۔

ایکسپریس نیوز کے مطابق وفاقی سرکاری تعلیمی اداروں کی سکیورٹی کے لیے نیا ہدایت نامہ جاری کردیا ہے جس کے مطابق ہر ادارے کو 2 سے 3 اسلحہ لائسنس دیئے جائیں گے. ڈائریکٹر جنرل وفاقی نظامت تعلیمات معین الدین وانی نے تمام اداروں کو مراسلہ جاری کیا ہے جس میں کہا گیا ہے کہ اسلحہ لائسنس کے لیے اداروں کے سربراہان درخواست کمشنر اسلام آباد کو بھجوائیں، اداروں کی چاردیواری کو جلد سے جلد اونچا کیا جائے اور ان پر خاردار تاریں لگائی جائیں۔

وفاقی نظامت تعلیمات کی جانب سے جاری مراسلے میں سی سی ٹی وی کیمروں کی تنصیب، گاڑیوں کے معائنہ کے لیے خصوصی شیشے خریدنے اور ایمرجنسی راستے بنانے کے احکاما ت بھی جاری کئے گئے ہیں جب کہ اسکولوں کی عمارتوں پر نگرانی کے لئے چیک پوسٹیں قائم کرنے اور تربیت یافتہ گارڈرکھنے کی بھی ہدایات بھی جاری کی گئی ہیں، اداروں کی حفاظت کے لیے نجی سکیورٹی ایجنسیز کی خدمات لینے کا بھی فیصلہ کیا گیا ہے۔