ترکی کے ساحل کے قریب تارکین وطن کی کشتی الٹنے سے 40 افراد جاں بحق

جاں بحق ہونے والوں میں 5 بچے بھی شامل ہیں جب کہ 75 افراد کو ریسکیو کرلیا گیا، کوسٹ گارڈ حکام، فوٹو؛ فائل

---

ترکی کے ساحل کے قریب تارکین وطن کو یونان لے جانے والی کشتی الٹ گئی جس میں سوار 40 افراد ڈوب کر جاں بحق ہوگئے جب کہ 75 کو ریسکیو کر لیا گیا ہے۔

غیر ملکی خبر رساں ادارے کے مطابق 150 سے زائد تارکین وطن کو یونان لے جانے والی کشتی گنجائش سے زیادہ بھر جانے کی وجہ سے اپنا توازن قائم نہ رکھ سکی اور ترکی کے مغربی ساحل ایواسک کے قریب الٹ گئی جس کے نتیجے میں 40 افراد ڈوب کر جاں بحق ہوگئے جب کہ اس میں سوار 75 افراد کو ترک کوسٹ گارڈ نے ریسکیو کرلیا۔ ترک علاقے ایواسک کے میئر کا کہنا تھا کہ انہیں خدشہ ہے کہ مرنے والوں کی تعداد میں اضافہ ہوسکتا ہے کیوں کہ کشتی میں بہت بڑی تعداد میں لوگ سوار تھے۔

ترک کوسٹ گارڈ کے مطابق مرنے والوں میں 5 بچے بھی شامل ہیں جب کہ ریسکیو کیے جانے والے افراد کو قریبی اسپتال بھیج دیا گیا ہے۔ مقامی نیوز ایجنسی کا کہنا ہے کہ ان تارکین وطن میں شام، افغانستان اور میانمارسے تعلق رکھنے والے افراد شامل ہیں۔