نوجوان ہی ملک کو قائد اعظم کا پاکستان بناسکتے ہیں عمران خان

تحریک انصاف کے چیئرمین نے کہا کہ تحریک انصاف نوجوانوں ہی کی حمایت سے ملک کی ساری جماعتوں کا مقابلہ کرے گی۔ فوٹو: رائٹرز/ فائل

---

تحریک انصاف کے چیئرمین عمران خان نے کہا کہ مجھے نیا پاکستان بنانے کے لئے نوجوانوں کی ضرورت ہے بڑے بڑے سیاستدانوں کی نہیں کیونکہ نوجوان ہی ملک کو قائد اعظم کا پاکستان بناسکتے ہیں۔

لاہور میں تحریک انصاف کے یوتھ کنوشن سے خطاب کرتے ہوئےعمران خان نے کہا کہ پارٹی انتخابات کے بعد ملک میں خوفناک سونامی آئے گا، نوجوانوں کو اگلے انتخابات میں 25 فیصد ٹکٹس دئیے جائیں گے۔

عمران خان نے کہا کہ مفاد پرست لوگ نوجوانوں کا مقابلہ نہیں کرسکتے، تحریک انصاف نوجوانوں ہی کی حمایت سے ملک کی ساری جماعتوں کا مقابلہ کرے گی۔

تحریک انصاف کے چئیرمین نے کہا کہ پاکستان کے نوجوانوں کو خریدا نہیں جاسکتا، نوجوان پارٹی کے انتخابات میں بھر پور شرکت کریں کیونکہ پارٹی انتخابات کے بعد خوفناک طوفان آئے گا۔

عمران خان نے کہا کہ خودغرض اور جھوٹا انسان کبھی لیڈر نہیں بن سکتا کیونکہ جھوٹے کی کوئی عزت نہیں کرتا اور تحریک انصاف ایک سچ ہے ۔