پرانے ڈیزائن کے نوٹ یکم دسمبر2016 سے کارآمدنہیں رہیں گے

بینک 10، 50، 100 اور1000 روپے کے پرانے نوٹ 30نومبرتک وصول کرینگے، ایس بی پی فوٹو: فائل

---

WASHINGTON: اسٹیٹ بینک آف پاکستان نے ایک بار پھر یاددہانی کرائی ہے کہ یکم دسمبر 2016 سے پرانے ڈیزائن کے بینک نوٹوں کی قانونی حیثیت ختم ہو جائے گی۔

اس سلسلے میں وفاقی حکومت نے 4 جون 2015 کو گزٹ نوٹیفکیشن جاری کیاتھا، 5 روپے اور پرانے ڈیزائن کے 500 روپے کے نوٹ کی قانونی حیثیت پہلے ہی ختم ہو چکی ہے، اب باقی رہ جانے والے 10، 50، 100 اور1000 روپے کے پرانے ڈیزائن کے بینک نوٹوں کو بھی مرحلہ وار ختم کر دیا جائیگا۔

کمرشل اور مائیکروفنانس بینک 10، 50، 100 اور 1000 روپے کے پرانے ڈیزائن کے بینک نوٹوں 30 نومبر 2016 تک وصول اور ان کا اتنی ہی مالیت کے نئے بینک نوٹوں اور سکوں سے تبادلہ جاری رکھیں گے تاہم ایس بی پی بی ایس سی کے فیلڈ دفاتر 31 دسمبر 2021 تک عوام سے 10، 50، 100 اور 1000روپے کے پرانے ڈیزائن کے بینک نوٹ قبول کرتے رہیں گے۔

یاد رہے کہ بینک دولت پاکستان نے نئے ڈیزائن کے بینک نوٹوں کی سیریز کا آغاز 2005 میں20 روپے مالیت کا نوٹ جاری کرنے کے ساتھ کیا تھا جس کا مقصد نوٹوں کی سیکیورٹی، پائیداری اور جمالیاتی معیار میں بہتری لانا تھا، مشتمل نئے ڈیزائن کے 5، 10، 20، 50، 500، 1000 اور 5000 روپے کے بینک نوٹوںکی مکمل سیریزکا اجرا2008 میں مکمل ہو ا تھا۔