بالی ووڈ کے بڑے ستاروں کی موجودگی میں ممبئی کے ثقافتی شومیں آگ لگ گئی

بالی ووڈ کے میگا اسٹار امیتابھ بچن ، مسٹر پرفیکشنسٹ عامر خان اور ڈریم گرل ہیما مالنی کی موجودگی میں ممبئی کے ثقافتی شو میں پر فارمنس کے دوران اچانک اسٹیج پر آگ بھڑک اٹھی جس نے اسٹیج کو اپنی لپیٹ میں لے لیا۔

ممبئی میں مہاراشٹرا حکومت کی جانب سے ثقافتی شو کا انعقاد کیا گیا جس میں بالی ووڈ ستاروں امیتابھ بچن، عامر خان اور اداکارہ ہیما مالنی سمیت اہم سیاسی شخصیات شریک تھیں کہ پرفارمنس کے دوران آگ نے اسٹیج کو اپنی لپیٹ میں لے لیا جس کے باعث بھگدڑ مچ گئی اور وہاں موجود سیکیورٹی اہلکاروں نے اسٹیج پر پرفارم کرنے والے فنکاروں کو بحفظات باہر نکال دیا جب کہ آگ لگنے کے بعد شرکا نے بھی فوری طور پر محفوظ مقام کی جانب دوڑ لگائی۔ آگ لگنے کے واقعے کے بعد ثقافتی شو کو فوری طور پر منسوخ کردیا گیا جب کہ فائر بریگیڈ کے عملے نے ایک گھنٹے کی جدوجہد کے بعد آگ پر قابو پایا تاہم واقعے میں کسی جانی نقصان کی اطلاع نہیں۔


آتشزدگی کے واقعے سے چند منٹ قبل ہی بالی ووڈ کے میگا اسٹارامیتابھ بچن نے اپنی شاعر ی سے حاضرین کو محظوظ کیا تھا اور کچھ ہی دیر میں بالی ووڈاسٹار عامر خان کو بھی پرفارمنس کا مظاہرہ کرنا تھا جب کہ اداکارعامر خان کا کہنا تھا کہ اپنی پرفارمنس کی تیاری کررہا تھا کہ آتشزدگی کا واقعہ پیش آیا جس کے باعث شو کو روک دیا گیا۔

واضح رہے کہ بھارتی وزیراعظم نریندر مودی نے گزشتہ روز ممبئی کے ثقافتی شو کا افتتاح کیا تھا۔