وزیراعظم نواز شریف اور عمران خان کو پی ایس ایل کا فائنل میچ دیکھنے کی دعوت

وزیراعظم پی سی بی کےپیٹرن انچیف ہیں اورعمران خان ورلڈکپ جیتنے والی ٹیم کے کپتان،اس لئےاس پرسیاست نہ کی جائے،نجم سیٹھی. فوٹو:پی ایس ایل

---

پاکستان سپرلیگ کے چیئرمین نجم سیٹھی نے پی ایس ایل کے فائنل میچ دیکھنے کے لئے وزیراعظم نواز شریف اور چیئرمین تحریک انصاف عمران خان کو دعوت دی ہے۔

سماجی رابطے کی ویب سائٹ ٹوئٹر پر نجم سیٹھی نے اپنی ٹوئٹ میں وزیراعظم نواز شریف اور چیئرمین پی ٹی آئی عمران خان کو 23 فروری کو ہونے والے پی ایس ایل کا فائنل میچ دیکھنے کی دعوت دی۔ ان کا کہنا تھا کہ وزیراعظم نواز شریف کو پی سی بی کے پیٹرن ان چیف ہونے اور عمران خان کو ورلڈ کپ جیتنے والی قومی فاتح ٹیم کے کپتان کی حیثیت سے دعوت دی گئی ہے اس لئے شائقین سیاست کو ایک طرف رکھتے ہوئے صرف کرکٹ کو دیکھیں۔

I invite Patron PCB Nawaz Sharif & WC winning captain Imran Khan to PSL Final on 23rd Feb. Gentlemen, put politics aside and watch cricket!

— Najam Sethi (@najamsethi) February 14, 2016

دوسری جانب تحریک انصاف کے ترجمان نعیم الرحمان نے ایکسپریس نیوز سے بات کرتے ہوئے کہا کہ عمران خان کو پی ایس ایل کا فائنل میچ دیکھنے کی باضابطہ کوئی دعوت نہیں دی گئی تاہم اگر دعوت مل بھی جاتی ہے تو وہ ذاتی مصروفیات کے باعث فائنل میچ دیکھنے نہیں جاسکیں گے۔