ہوش میں آتے ہی ریسلرگریٹ کھالی نے اپنے حریف سے انتقام لینے کا اعلان کردیا

باڈی اسٹیل سے دوبارہ مقابلے کے لیے تیار ہوں اور ڈاکٹروں کے منع کرنے کے باوجود رنگ میں مقابلہ کروں گا، گریٹ کھالی۔ فوٹو فائل

---

KARACHI: ریسلنگ ویسے ہی خونی کھیل ہے اور کم ہی ایسا ہوتا ہے کہ کوئی ریسلر دوسرے سے انتقام نہ لے لیکن بھارتی ریسلر گریٹ کھالی نے انہیں زخمی کرنے والے کینیڈا کے ریسلر سے خونی انتقام کا اعلان کردیا اور کہا ہے کہ وہ اس پر کوئی رحم نہیں کھائیں گے۔

دوروز قبل ریسلنگ رنگ میں بھارتی ریسلردلیپ سنگھ راناعرف گریٹ کھالی اور کینیڈا کے ریسلر باڈی اسٹیل ایک دوسرے کے مد مقابل تھے اور ایک زوردار اور سنسنی خیز فائٹ جاری تھی کہ کچھ ہی دیر میں یہ لڑائی خونی جنگ میں اس وقت بدل گئی جب باڈی اسٹیل کے مزید 2 ساتھی رنگ میں اتر آئے اور انہوں نے گریٹ کھالی کو زمین چاٹنے پر مجبور کردیا اور وہ خون میں لت پت ہوگئے، کھالی کو بے ہوشی کی حالت میں اسپتال لے جایا گیا جہاں انہیں اب ہوش آگیا ہے اور انہوں نے ہوش میں آتے ہیں باڈی اسٹیل سے انتقام لینے کے عزم کا اظہار کیا ہے۔



گریٹ کھالی کا کہنا ہے کہ وہ اس برے وقت سے باہر نکل آئے ہیں اور باڈی اسٹیل سے دوبارہ مقابلے کے لیے تیار ہیں اور ڈاکٹروں کے منع کرنے کے باوجود رنگ میں مقابلہ کریں گے اور بھرپور انتقام لیں گے۔ ان کا کہنا تھا کہ رنگ میں بہائے گئے خون کے ایک ایک قطرے کا حساب لوں گا،خون کے بدلے خون اور کرسی کے بدلے کرسی کیوں کہ ان کے اندر انتقال کی آگ بھڑک رہی ہے اور وہ اپنے مداحوں کے سامنے شرمندہ ہیں لیکن 28 فروی کوباڈی اسٹیل کو دوبارہ رنگ میں اترنے کا چیلنج دیتا ہوں۔

واضح رہے کہ باڈی اسٹیل کے ساتھ فائٹ کے دوران دو دیگر ریسلرز رنگ میں آگئے تھے اور انہوں نے بھارتی ریسلر کو لوہے کی کرسی سے مارا جس سے کھالی کے سر میں فریکچر ہوگیا تھا۔