بیٹے کی شہادت نہ صرف میرے لئے بلکہ پاک فوج اور پوری قوم کیلئے فخر کی بات ہے والد کیپٹن عمیر

شوال میں دہشت گردوں کے خلاف کارروائی میں شہید ہونے والے کیپٹن عمیر عباسی کے والد کا کہنا ہے کہ بیٹے کی شہادت نہ صرف میرے اور میرے خاندان کے لئے بلکہ پاک فوج اور پوری قوم کے لئے فخر کی بات ہے۔

ایکسپریس نیوز کے مطابق کیپٹن عمیر شہید کے والد کا کہنا تھا کہ بیٹے کی شہادت پر مجھے فخر ہے، وہ ہر شعبے میں قابل تھا اور ہمارا شہزادہ تھا۔ ان کا کہنا تھا کہ کیپٹن عمیر کی قربانی نہ صرف میرے لئے، بلکہ خاندان، پاک فوج اور پورے قوم کے لئے فخر کی بات ہے۔


والد کیپٹن عمیر عباسی نے کہا کہ بیٹے کی شہادت سے ہمارے حوصلے مزید بلند ہو گئے ہیں، میرا دوسرا بیٹا بھی آرمی میں ہے اور میں نے پاک فوج کے سپہ سالار سے اسے فوری طور پر اگلے جنگی محاذ پر بھیجنے کا کہا ہے۔

واضح رہے کہ گزشتہ روز شمالی وزیرستان کی تحصیل شوال میں دہشت گردوں کے ساتھ مقابلے میں کیپٹن عمیر عباسی سمیت پاک فوج کے 4 جوان شہید ہو گئے تھے جب کہ افغانستان فرار ہونے کی کوشش کرنے والے 19 دہشت گرد بھی مارے گئے تھے۔