کنگ خان اور سلمان خان باکس آفس پر ایک بار پھر آمنے سامنے

شاہ رخ خان کی نئی آنے والی فلم’’رئیس‘‘ اور سلمان خان کی فلم’’سلطان‘‘ ایک ساتھ عید کے موقع پرریلیز ہورہی ہیں

ویب ڈیسک March 03, 2016

شاہ رخ خان کی نئی آنے والی فلم’’رئیس‘‘ اور سلمان خان کی فلم’’سلطان‘‘ ایک ساتھ عید کے موقع پرریلیز ہورہی ہیں،فوٹو:فائل

بالی ووڈ کے کنگ شاہ رخ خان اور دبنگ سپر اسٹار سلمان خان اپنی فلموں کی ایک ساتھ نمائش کے بعد باکس آفس پر ایک بار پھر سامنے آگئے ہیں۔

بالی ووڈ کے حکمران خانز شاہ رخ خان اور سلمان خان کی آپس میں گہری دوستی ہے یہی وجہ ہے کہ دونوں اداکار ایک دوسرے کی فلموں کی تشہیر کے ساتھ ساتھ تعریفیں کرتے نہیں تھکتے جب کہ دونوں اداکاروں کی فلمیں ایک ساتھ رواں سال عید کے موقع پر نمائش کے لیے پیش کی جارہی ہیں جس پر بالی ووڈ میں باکس آفس پر بڑے مقابلے کی توقع کی جارہی ہے۔

شاہ رخ خان کی نئی آنے والی فلم ''رئیس'' اور سلمان خان کی فلم ''سلطان'' ایک ساتھ عید کے موقع پر ریلیز کی جائیں گی جب کہ گزشتہ دنوں میڈیا میں شاہ رخ خان کی جانب سے اپنی فلم کی نمائش کی تاریخ آگے بڑھانے کی خبریں سامنے آئی تھیں جس کی اب فلم ڈائریکٹر نے تردید کردی ہے۔

دوسری جانب یش راج فلز کے ترجمان نے بھی سلمان خان کی نئی آنے والی فلم ''سلطان'' کی نمائش شیڈول کے مطابق ہونے کا اعلان کیا ہے جس کے بعد اب ایک بار پھر باکس آفس پر دونوں خانز میں سخت مقابلے کی توقع کی جارہی ہے۔

واضح رہے کہ گزشتہ دنوں بالی ووڈ اداکار سلمان خان پہلی ہی کنگ خان کو باکس آفس کا کنگ قرار دے چکے ہیں۔