ای میل کے بانی رائے ٹام لینسن 74 برس کی عمر میں چل بسے

رائے ٹام لینسن نے 1971 میں پہلا الیکٹرونک میسج بھیج کر مواصلات کی دنیا میں انقلاب برپا کیا تھا۔ فوٹو:فائل

---

RAWALPINDI: ای میل کے بانی رائے ٹام لینسن 74 برس کی عمر میں انتقال کرگئے۔

دنیا کو جدت کی راہوں پر استوار کرنے والا آج ایک اور نام چل بسا، رائے ٹام لینسن نے 1971 میں پہلا الیکٹرونک میسج بھیج کر مواصلات کی دنیا میں انقلاب برپا کیا اور الیکٹرانک میل کے لئے انہوں نے ایٹ دی ریٹ (@) سیمبل کا انتخاب کیا جب کہ اس دور میں ایک کمپیوٹر سے دوسرے کمپیوٹر پر پیغام بھیجنا کسی خواب سے کم نہ تھا جسے ٹام لینسن نے حقیقت کر دکھایا۔

ٹام لینسن کے انتقال پر گوگل کی جی میل ٹیم نے بھی افسوس کا اظہار کرتے ہوئے (@) کا سیمبل متعارف کرانے پر ان کا شکریہ ادا کیا اور اپنی ٹوئٹ میں کہا کہ (@) کا سیمبل دنیا کے نقشے پر لانے کے لئے ہم ٹام لینسن کے شکر گزار ہیں۔

Thank you, Ray Tomlinson, for inventing email and putting the @ sign on the map. #RIP

— Gmail (@gmail) March 6, 2016

ٹام لینسن کے مطابق انہوں نے پہلا میسج خود کو ہی بھیجا تھا جس کے لئے انہوں نے آرپا نیٹ کا انتخاب کیا اور دو کمپیوٹروں کو پاس پاس رکھ کر خود کو ای میل کرتے اور جو پہلا میسج انہوں نے اپنے آپ کو بھیجا اس میں QWERTYUIOP لکھا تھا۔