امیتابھ بچن اور ایشوریا رائے باکس آفس پر پہلی بار آمنے سامنے

سسر اور بہو کی ایک ہی دن فلموں کی ریلیزکے باعث دونوں کے درمیان پہلی بار باکس آفس پر شدید مقابلے کی توقع کی جارہی ہے۔ فوٹو؛ فائل

---

بالی ووڈ کے میگا اسٹار امیتابھ بچن اور ان کی بہو سابق حسینہ عالم ایشوریا رائے بچن پہلی بار باکس آفس آمنے سامنے آگئے۔

بالی ووڈ اداکار امیتابھ بچن فلم نگری کی معروف شخصیت ہیں جن کے تعارف کے بغیر بھارتی فلم نگری نامکمل ہے جب کہ انہوں نے فلمی کیرئیر میں متعدد فلموں میں اداکاری کے جوہر دکھائے ہیں جس میں کئی سپر ہٹ فلمیں شامل ہیں یہی وجہ ہے کہ ماضی کے کئی نامور اداکار باکس آفس پر ان سے مقابلہ کرنے میں ناکام نظر آئے تاہم اب ان کی بہو سابق حسینہ عالم اداکارہ ایشوریا رائے بچن انہیں باکس آفس پر مشکلات بڑھانے کے لیے تیار ہیں۔

بالی ووڈ میں بگ بی کے نام سے مشہور اداکار امیتابھ بچن اپنی نئی آنے والی فلم ''ٹی ای تھری این'' اور ان کی بہو اداکارہ ایشوریا رائے بچن بھارتی جاسوس کی زندگی پر بننے والی فلم ''سر بجیت'' کی شوٹنگ میں مصروف ہیں جب کہ دونوں فلموں کے پروڈیوسرز نے رواں سال 20 مئی کو اپنی فلموں کی نمائش کا اعلان کیا ہے جس کے بعد بھارتی سینما کی تاریخ میں پہلی بار سسر اور بہو کے درمیان باکس آفس پر شدید مقابلے کی توقع کی جارہی ہے۔

واضح رہے کہ فلم ''ٹی ای تھری این'' میں اداکار امیتابھ بچن ، نواز الدین صدیقی اور ودیابالن مرکزی کردار ادا کریں گی۔