فیس بک پرامام کعبہ الشیخ عبدالرحمان السدیس کے نام سے جعلی اکاؤنٹ کا انکشاف

امام کعبہ کا کوئی بھی بیان یا تو حرمین کے سماجی رابطے کے خصوصی اکاؤنٹ کے ذریعے شائع کیا جاتا ہے،ادارہ حرمین شریفین:فوٹو: فائل

---

KARACHI: مسجد حرام اور مسجد نبوی کے نگراں ادارے نے وضاحت کی ہے کہ امام کعبہ الشیخ عبدالرحمان السدیس کا سماجی رابطے کی ویب سائٹ فیس بک پر کوئی اکاؤنٹ نہیں ہے۔

نگراں ادارے کے مطابق امام کعبہ الشیخ عبدالرحمان السدیس کے نام سے بنائے گئے تمام اکاؤنٹ یا صفحات جعلی ہیں۔ حرمین شریفین کے ادارے کا کہنا ہے کہ امام کعبہ کا کوئی بھی بیان یا تو حرمین کے سماجی رابطے کے خصوصی اکاؤنٹ کے ذریعے شائع کیا جاتا ہے یا وہ ٹوئٹر پر بنے خصوصی اکاؤنٹ سے بیان جاری کرتے ہیں۔

خیال رہے کہ حال ہی میں الشیخ عبدالرحمان السدیس کے نام سے فیس بک پر بنے ایک صفحے پر تیونس میں فوجی کارروائی میں 42 دہشتگردوں کی ہلاکت کی تحسین کی گئی تھی۔ اس جعلی اکاؤنٹ پر عبدالرحمان السدیس کے نام منسوب بیان میں لکھا گیا کہ ان 42 چوہوں کی ہلاکت میں امریکہ کا کوئی کردار ہے نہ روس یورپ یا عرب اتحاد کا کوئی حصہ ہے۔ ان دہشتگردوں کی ہلاکت کا کریڈٹ صرف تیونس کی افواج کو جاتا ہے۔