دبنگ خان نے اداکارہ ڈیزی شاہ کو لگژری کار تحفے میں دے دی

اداکارہ ڈیزی شاہ نے فلم’’جے ہو‘‘ میں سلمان خان کے مدمقابل مرکزی کردار ادا کیا تھا، فوٹو: فائل

---

بالی ووڈ کے دبنگ سپر اسٹار سلمان خان نے فلم ''جے ہو'' میں مرکزی کردار ادا کرنے والی اپنی قریبی دوست اور ساتھی اداکارہ ڈیزی شاہ کو لگژری گاڑی تحفے میں دے دی۔

بالی ووڈ اداکار سلمان خان اداکاری کے ساتھ ساتھ اپنی دوستی اور فیاضی کے باعث بھی فلم نگری میں شہرت رکھتے ہیں یہی وجہ ہے کہ فلم نگری میں سب ہی سلو میاں کی دوستی کے متلاشی ہوتے ہیں جب کہ دبنگ خان اپنی دوستی نبھانے کے لیے نہ صرف فلموں میں دوستوں کو کاسٹ کرواتے ہیں بلکہ مہنگے ترین تحفے تحائف کا بھی تبادلہ کرتے رہتے ہیں تاہم اب کی بار انہوں نے اپنے ساتھ ایک فلم میں مرکزی کردار نبھانے والی اداکارہ پر فیاضی کردی ہے۔

میڈیا رپورٹس کے مطابق سلمان خان نے دوستوں کے لیے سخاوت کا مظاہرہ کرتے ہوئے اپنی قریبی دوست اور ساتھی اداکارہ ڈیزی شاہ کو لگژری گاڑی تحفے میں دے دی ہے جس کی مالیت لاکھوں میں بتائی جارہی ہے جب کہ اداکارہ ڈیزی شاہ سلو میاں کی جانب سے مہنگا تحفہ ملنے پر خوشی سے پھولے نہیں سمارہی ہیں۔

واضح رہے کہ اداکارہ ڈیزی شاہ نے 2014 میں ریلیز ہونے والی فلم''جے ہو'' میں سلمان خان کے مدمقابل مرکزی کردار ادا کیا تھا۔