بنگال ٹائیگرز کو آج اجنبی دشمن کا انجانا چیلنج درپیش

اومان کیخلاف فتح سپر10میں رسائی دلادے گی، بارش پر نیٹ رن ریٹ کام آئے گا

Sports Desk March 13, 2016

آئرلینڈ اور نیدرلینڈز کی ٹیموں کے درمیان دھرم شالا میں ہی وقارکی رسمی جنگ فوٹو : ایکسپریس

ورلڈ ٹوئنٹی 20 گروپ اے میں آج بنگلہ دیش کا مقابلہ اومان اور آئرلینڈ کا سامنا نیدرلینڈز سے ہوگا۔ بنگال ٹائیگرز کو اجنبی دشمن کا انجانا چیلنج درپیش ہے جب کہ اومانی ٹیم مین راؤنڈ میں رسائی کیلیے پوری قوت صرف کرنے کیلیے پُراعتماد ہے۔

تفصیلات کے مطابق ٹورنامنٹ کے آغاز پر کسی نے سوچا بھی نہیں تھا کہ اومان کی ٹیم مین راؤنڈ میں شمولیت کی دعویدار بن کر سامنے آئے گی، مگر اس نے آئرلینڈ کو آخری اوور میں شکست دے کر سب کو حیران کردیا، نیدرلینڈز سے مقابلہ بارش کی نذرہوگیا اور اب مین راؤنڈ میں جگہ پانے کا حیرت انگیز کارنامہ انجام دینے کیلیے اسے راہ میں حائل بنگلہ دیش کی صورت میں مضبوط حریف کا چیلنج درپیش ہے۔

ٹائیگرز کے بھی آئرلینڈ سے مقابلے میں بارش حائل ہوئی تھی مگر اس سے قبل تمیم اقبال نے عمدہ بیٹنگ کا مظاہرہ کیا اور ٹیم نے 8 اوورز میں 2 وکٹ پر 94 رنز بنالیے تھے۔ بنگلہ دیش کی مضبوط اور ان فارم بیٹنگ لائن کو قابو کرنے کیلیے اومان کو اجے لالچیتا اور مونس انصاری سے توقعات وابستہ ہیں، اسی طرح ذیشان مقصود اور خاور علی بھی امیدوں کا محور ہیں۔ بارش کا خطرہ ایک بار پھر موجود ہے۔

اگر اتوار کا میچ بھی موسم کی نذر ہوگیا تو پھر بنگلہ دیش رن ریٹ کی بنیاد پر اگلے راؤنڈ میں چلا جائے گا۔ دوسری جانب آئرلینڈ اور نیدرلینڈز میں مقابلہ رسمی مگر دونوں وقار کی بحالی کیلیے کھیلیں گے، گذشتہ ایونٹ میں دونوں ٹیموں کے درمیان مین راؤنڈ میں رسائی کیلیے جنگ ہوگی مگر اب دونوں واحد فتح کیلیے ایک دوسرے سے ٹکرائیں گے۔