شفقت امانت علی نے قومی ترانہ غلط پڑھنے پرمعافی مانگ لی

میری اتنے سالوں کی وطن سے والہانہ محبت کے باوجود ہم وطنوں کے مجھ پر اتنے تھوڑے اعتماد سے دلی صدمہ پہنچا، شفقت امانت علی۔ فوٹو: اے ایف پی

---

نامور پاکستانی گلوکار شفقت امانت علی نے بھارت میں قومی ترانہ پڑھنے میں غلطی پر معافی مانگ لی۔

شفقت امانت علی نے مائیکرو بلاگنگ ویب سائٹ ٹویٹر پر اپنے پیغام میں کہا کہ میں مانتا ہوں کہ پاک بھارت میچ سے قبل قومی ترانہ پڑھنے میں کچھ آڈیو اور ٹیکنیکل مسائل تھے جس کی وجہ سے ایسا محسوس ہوا کہ شاید پڑھنے میں غلطی ہوئی جس پر میں اپنے دوستوں اور ہم وطنوں سے معافی چاہتا ہوں کہ میں ان کی توقعات پر پورا نہ اتر سکا۔ ان کا کہنا تھا کہ میں آپ لوگوں کو یقین دلاتا ہوں کہ ایسا ہو ہی نہیں سکتا کہ میں اپنا پیارا ''قومی ترانہ'' بھول جاؤں، اگر ایسا ہوتا تو پھر لوگ میرے پاس یہ کہنے کیلئے نہ آتے کہ آپ کی پرفارمنس بہت اچھی تھی۔

Here is my apology... pic.twitter.com/09aGpMqhRs

— Shafqat Amanat Ali (@ShafqatAmanatA) March 20, 2016

اس تمام تر صورت حال کے باوجود میں معافی چاہتا ہوں کیونکہ میں اس بات پر یقین نہیں رکھتا کہ معافی مانگنے سے میرے فن یا شخصیت میں کوئی کمی واقع ہو گی، لیکن یہ ضرور کہوں گا کہ میری اتنے سالوں کی وطن سے والہانہ محبت کے باوجود ہم وطنوں کی مجھ پر اتنے تھوڑے اعتماد سے مجھے دلی صدمہ پہنچا۔ اس کے باوجود ہمیں گرین شرٹس پر اعتماد رکھنا چاہیئے کیونکہ وہی ہماری ٹیم ہے۔

واضح رہے کہ گزشتہ روز کولکتہ کے ایڈن گارڈن میں پاک بھارت میچ سے قبل ہونے والی تقریب میں شفقت امانت علی نے پاکستان کا قومی ترانہ پڑھا تھا جس میں انھوں نے پرچم ستارو ہلال کی جگہ 'پرچموں' ستارو ہلال پڑھ دیا تھا جب کہ ترجمان ماضی شان حال کی ادائیگی بھی غلط کی تھی جس پر انھیں سوشل میڈیا پر شدید تنقید کا نشانہ بنایا جا رہا ہے۔