اسپین میں یونیورسٹی کی بس الٹنے سے 14 طالب علم ہلاک 30 زخمی

بس بارسلونا اور ویلنسیا کے درمیان واقع ساحلی شہر فریگنالس کے قریب ایک کار سے ٹکرا کر الٹی۔ فوٹو: اے ایف پی

---

اسپین میں یونیورسٹی کی بس الٹنے سے 14 طالبعلم ہلاک جب کہ 30 سے زائد زخمی ہوگئے۔

غیر ملکی خبر ادارے کے مطابق اسپین کی مشہور درسگاہ بارسلونا یونیورسٹی کے طالب علم فرانس اور اسپین کی سرحد پر منعقد ہونے والا سالانہ آتش بازی کا مقابلہ دیکھ کر واپس آرہے تھے کہ ان کی بس بارسلونا اور ویلنسیا کے درمیان صوبے کیٹالونیہ کے ساحلی شہر فریگنالس کے قریب ایک کار سے ٹکرا کر الٹ گئی اور تیزرفتاری کے باعث شاہراہ پر قلابازیاں کھاتی ہوئی سڑک کنارے جا پہنچی جس کے باعث بس میں سوار 14 طالبعلم ہلاک اور 30 زخمی ہوگئے۔

اسپین کے شمال مشرقی صوبے کے حکام کے مطابق اتوار کی صبح فرانس اوراسپین کو جوڑنے والی ہائی وے پر بحرِ اوقیانوس کے ساحل پر واقع شہر فریگنالس کے قریب یہ حادثہ پیش آیا ہے جو بارسلونا اور ویلنسیا کے درمیان واقع ہے۔



کیٹالونیہ کی ترجمان جورڈی جین کا کہنا ہے کہ حادثے کے وقت بس میں یونیورسٹی کے طلبہ سمیت 60 افراد سوار تھے۔ 22 سے 29 سال کی عمر کے طلبہ و طالبات میں سے بیشتر کا تعلق برطانیہ، ترکی، ناروے اور سوئٹزر لینڈ سے تھا۔ حادثے میں اب تک 14 طلبہ ہلاک ہوچکے ہیں جب کہ 30 زخمی ہیں جنہیں طبی امداد دی جارہی ہے۔