اسپورٹس فیسٹیول فٹبال میں یمن نے منگولیا کو مات دیدی

انٹرنیشنل اسپورٹس فیسٹیول کے دلچسپ اور سنسنی خیز مقابلے لاہور میں جاری ہیں۔


تیسرے روز پنجاب اسٹیڈیم میں کھیلے گئے فٹبال میچ میں یمن نے منگولیا کوصفر کے مقابلے میں ایک گول سے مات دے دی، فیصلہ کن گول دوسرے ہاف میں علی نے کیا، منگولیا کے کھلاڑیوں نے خسارہ ختم کرنے کیلیے مخالف ٹیم کے گول پوسٹ پر تابڑ توڑ حملہ کیے لیکن کامیاب نہ ہوسکے۔ ایونٹ کا تیسرا میچ اتوار کو پنجاب گرین اور سربیا کے مابین کھیلا جائے گا۔ بیس بال میں پاکستان نے نیپال کو یکطرفہ مقابلے کے بعد صفر کے مقابلے میں 15اسکور سے شکست دی۔ جوجسٹو میں پاکستانی عاصم معین نے جنوبی کورین کھلاڑی کو ہرا دیا۔قازقستان کے کھلاڑی کو جنوبی کورین حریف کے ہاتھوں شکست کا سامنا کرنا پڑا۔

ایرانی کھلاڑیوں کے درمیان مقابلوں میں علی نبیرو نے ہم وطن کو ہرایا جبکہ آخری مقابلے میں پنجاب کے محمد علی نے عراقی کھلاڑی حسین محمد کو چت کر دیا۔ دریں اثنا پاک بھارت ڈیف دوستی کرکٹ کپ میں میزبان نے3-0سے کلین سوئپ کر لیا ۔ بیڈ منٹن میچ میں پاکستان نے بھارت کو 2-0،ٹیبل ٹینس مقابلے میں 3-0 جبکہ شطرنج میں2-1سے مات دی۔