ٹی ٹوئنٹی ورلڈ کپ پاکستان اپنا اہم میچ آج نیوزی لینڈ کے خلاف کھیلے گا

ٹی ٹوئنٹی ورلڈکپ کے گروپ بی میں آج پاکستان اپنا اہم میچ نیوزی لینڈ کے خلاف کھیلے گا جب کہ شکست اسے ایونٹ میں مشکلات سے دوچار کرسکتی ہے۔

بھارتی شہر موہالی میں آج ٹی ٹوئنٹی ورلڈکپ گروپ بی کے میچ میں پاکستان اور نیوزی لینڈ کی ٹیمیں مد مقابل ہوں گی۔ نیوزی لینڈ جیت کی صورت میں سیمی فائنل کے لیے کوالیفائی کرجائے گا جب کہ پاکستان کی شکست اسے ایونٹ میں مشکلات سے دوچار کرسکتی ہے تاہم جیت کی صورت میں پاکستان سیمی فائنل تک رسائی حاصل کرنے کی پوزیشن میں آسکتا ہے۔


پاکستان نے ایونٹ میں اپنے پہلے میچ میں بنگلا دیش کو 55 رنز سے شکست دی تاہم بھارت سے 5 وکٹوں سے اسے شکست کا سامنا کرنا پڑا۔

دوسری جانب نیوزی لینڈ اب تک ناقابل شکست رہی ہے پہلے میچ میں بھارت کو 47 رنز سے شکست دینے کے بعد کیویز نے آسٹریلیا کو بھی 8 رنز کی شکست سے دوچار کیا تھا اور اس وقت گروپ میں وہ پہلی پوزیشن پر ہے۔