آفریدی صاحب کہاں زیادہ پیار ملتا ہے

تم جیتو یا ہارو ہمیں تم سے پیار ہے، اور خدارا! اس پیار کو پیار ہی رہنے دو اور اب ریٹائرمنٹ لے لو۔

سید سبط حسان رضوی March 26, 2016

محترم شاہد آفریدی ایک میچ میں پرفارم کر کے بوم بوم کا ٹیگ لگائے اگلے میچوں میں اپنی جگہ پکی کرتے آئے ہیں۔

گزشتہ دنوں بھارت میں داخل ہوتے ہی پریس کانفرنس کے دوران دیا جانے والا محترم شاہد آفریدی کا ایک بیان کہ ''مجھے بھارت میں پاکستان سے زیادہ پیار ملتا ہے'' آفریدی سے پاکستانی قوم کی محبت پر سوالیہ نشان بن گیا، پاکستانی قوم اپنی محبت کا مذاق اڑانے پر بھی بوم بوم کی اوسط کارکردگی پر بھی داد و تحسین بلند کرتی رہی لیکن گذشتہ روز آسٹریلیا کے ہاتھوں شکست اور پاکستان کے ٹی ٹوئینٹی ورلڈ کپ سے باہر ہونے کے بعد کیا اس بیان کو حقیقت مان لیا جائے آفریدی صاحب؟

حقیقت کیا ہے؟ حقیقت اس سے مختلف ہے، یہ واقعی پاکستانیوں کا حوصلہ اور ان کی محبت ہے کہ اس قدر غیر سنجیدہ کرکٹ کے بعد بھی انہوں نے آخری دم تک آفریدی سے امید باندھے رکھی، مگر اب بہت ہوا قوم کو آپ کے ان مگر مچھ کے آنسوؤں کی کوئی ضرورت نہیں۔ قوم کو یہ بھی معلوم ہے کہ آپ کا اگلا بیان کیا ہوگا، کپتانی کو خیر باد مگر کرکٹ میں جوں کی طرح چپکے رہنے کا اعلان، اور اگر کسی طور کرکٹ چھوڑ بھی دی تو کسی کلب کی بنیاد رکھ کر وہاں سے جیب بھریں گے اور ساتھ ہی اشتہارات کی زینت بن کر خوب نوٹ کمائیں گے۔
یہ آفریدی کی ہی عمدہ کارکردگی و کپتانی ہے کہ بھارت کے خلاف ایڈن گارڈن میں ہونے والے میچ کی ناکامی کے بعد چیئرمین پی سی بی بھی بوکھلا گئے۔ پہلے پریس کانفرنس میں تسلیم کیا کہ قوم ٹیم سے کوئی امید ناں رکھے اور پھر اچانک دوبارہ پریس کانفرنس میں سیمی فائنل تک رسائی کی نوید سنادی۔ شہریار خان نے ٹی ٹوئینٹی ورلڈ کپ کے بعد آفریدی کے ٹیم میں نہ ہونے اور کپتانی سے ہٹائے جانے کا بھی عندیہ دیا جسے آفریدی نے پایہ تکمیل تک خود پہنچا دیا ہے۔
یہاں معاملے کی سنگینی کو نظر انداز نہیں کیا جاسکتا، نیوزی لینڈ کے خلاف میچ میں معلوم ہوا کہ پاکستانی ٹیم دو دھڑوں میں تقسیم ہو گئی ہے، اور سیلفی کنگ تک نے مخالف پارٹی جوائن کرلی ہے، مطلب کھیل نہ ہوا، سیاست ہو گئی کہ پارٹیاں جنم لیتی رہیں اور ملک پھر بھی بربادی کی جانب گامزن رہے۔
ورلڈ کپ سے قبل پاکستان سپر لیگ کے صرف ایک میچ کی کارکردگی دیکھ کر شرجیل اور محمد سمیع کو اہم ترین ایونٹ کا حصہ بنا دیا گیا اور رومان رئیس اور حماد اعظم جیسے نوجوانوں کو نظر انداز کردیا گیا۔ ایسا پہلی بار نہیں ہوا بلکہ ماضی میں بھی سرفراز احمد اور دیگر قابل پلئیرز کو نظر انداز کر کے پرچی والے کھلاڑیوں کو ٹیم کا حصہ بنایا گیا۔
اور ایسا ہی محترم شاہد آفریدی کا بھی معاملہ ہے جو ایک میچ میں پرفارم کر کے بوم بوم کا ٹیگ لگائے اگلے میچوں میں اپنی جگہ پکی کرتے آئے ہیں۔ بھارت کے خلاف اچانک بیٹنگ آرڈر میں تبدیلی کر کے خود میدان میں کود پڑنا بھی آفریدی کی نا اہل کپتانی کا منہ بولتا ثبوت ہے۔ یہ آفریدی ہی ہیں جنہوں نے صحافی کے سوال پر بڑے جوش بنا ہوش کے کہا تھا کہ،

''آپ سے ایسے ہی گھٹیا سوال کی امید تھی''۔

یہی نہیں بلکہ گذشتہ کئی عرصے سے آفریدی خاطرخواہ کارکردگی دکھانے میں ناکام رہے ہیں۔ آفریدی ہی نے کہا تھا کہ پاکستانی ویمنز ٹیم بریانی اچھی بنا سکتی ہے۔ اس ٹیم نے ثابت کیا کہ وہ بریانی کے ساتھ ساتھ بھارت کو شکست بھی دے سکتی ہیں، جو تم آج تک ورلڈ کپ میچز میں نہیں کر پائے۔ نیوزی لینڈ، بھارت اور آسٹریلیا کے خلاف پاکستان کی ناقص کار کردگی نے یہ بات واضح کردی ہے کہ اب ٹیم میں موجود سیاست کو باہر نکال پھینکنے اور سفارشی کھلاڑیوں کے سدباب کا وقت آن پہنچا ہے۔

اگر اب بھی کوئی مناسب فیصلہ نہیں کیا گیا تو بعید نہیں کہ ہم اگلے ورلڈ کپ کے کوالیفائنگ راؤنڈز میں ہی ایونٹ سے باہر ہو جائیں۔ نئی ٹیم کی بنیاد رکھنا اور خود اپنی خاطر کھیلنے والوں کو ٹیم سے نکال پھینکنا بہت مشکل عمل ہوگا۔ اس عمل سے ٹیم کو اپنے پاؤں پر کھڑا ہونے میں کافی عرصہ ہی کیوں ناں لگے لیکن ٹیم ملک کے لئے کھیلنا شروع کردے گی۔
اور ہاں آفریدی صاحب ایک بات اور یہ بات ٹھیک ہے کہ تم جیتو یا ہارو ہمیں تم سے پیار ہے، خدارا اس پیار کو پیار ہی رہنے دو اور اب ریٹائرمنٹ لے لو! ہوسکے تو اپنے ساتھ ملک، شہزاد اور اکمل کو بھی لیجائیے، اور جی بھر کر اشتہارات کی رونق بڑھائیے کیونکہ ہمیں ٹیم میں کھلاڑی درکار ہیں ماڈل نہیں۔

نوٹ: ایکسپریس نیوز اور اس کی پالیسی کا اس بلاگر کے خیالات سے متفق ہونا ضروری نہیں ہے۔

اگر آپ بھی ہمارے لیے اردو بلاگ لکھنا چاہتے ہیں تو قلم اٹھائیے اور 500 الفاظ پر مشتمل تحریر اپنی تصویر، مکمل نام، فون نمبر، فیس بک اور ٹویٹر آئی ڈیز اوراپنے مختصر مگر جامع تعارف کے ساتھ [email protected] پر ای میل کریں۔ بلاگ کے ساتھ تصاویر اورویڈیو لنکس۔