کراچی کے علاقے کورنگی میں رینجرز کی کارروائی 2 ٹارگٹ کلر گرفتار بڑی تعداد میں اسلحہ برآمد

کارروائی عسکری ونگ کے سابقہ سیکٹر انچارج کے گھر کی گئی جہاں سے بھاری اسلحہ برآمد ہوا، ترجمان رینجرز، فوٹو؛ فائل

---

رینجرز نے باغ کورنگی میں کارروائی کرکے 2 ٹارگٹ کلرز کو گرفتار کرلیا جن کے قبضے سے بھاری تعداد میں اسلحہ برآمد کیا گیا ہے ۔

ترجمان سندھ رینجرز کے مطابق کراچی کے علاقے باغ کورنگی میں خفیہ اطلاع پر عسکری ونگ کے سابقہ سیکٹر انچارج کے گھر پر چھاپہ مارا گیا جہاں سے 2 ٹارگٹ کلرز اور بھاری تعداد میں اسلحہ برآمد کرلیا گیا۔ ترجمان کے مطابق کارروائی پہلے سے گرفتار ملزمان کی نشاندہی پر کی گئی جب کہ کارروائی میں اسلحہ کا بڑا ذخیرہ ملا جن میں ایل ایم جی، 15 ایس ایم جی اور ہزاروں گولیاں شامل ہیں۔ ترجمان کا کہنا تھا کہ اسلحہ گھر کے خفیہ خانوں میں چھپایا گیا تھا جو شہر میں بے امنی کی کارروائی کے لیے استعمال ہونا تھا۔