پاکستان سمیت دنیا بھرمیں مسیحی برادری ایسٹر کا تہوارمنا رہی ہے

گرجا گھروں کو برقی قمقموں، رنگ برنگی جھنڈیوں اور دیگر آرائشی اشیاء سے خوبصورتی سے سجایا گیا ہے. فوٹو: فائل

---

پاکستان سمیت دنیا بھر میں مسیحی برادری ایسٹر کا تہوار مذہبی عقیدت و احترام کے ساتھ منا رہی ہے۔

دنیا بھرکی طرح پاکستان میں بھی ایسٹرکے موقع پرگرجا گھروں کو برقی قمقموں، رنگ برنگی جھنڈیوں اوردیگر آرائشی اشیاء سے خوبصورتی سے سجایا گیا ہے اور ملک کے تمام گرجا گھروں میں خصوصی عبادات کا اہتمام کیا گیا ہے۔

عبادات کے دوران ملکی سلامتی، استحکام، امن اور بھائی چارے کے فروغ کے لیے خصوصی دعائیں مانگی جا رہی ہیں۔ اس موقع پر سکیورٹی کے بھی انتہائی سخت انتظامات کئے گئے اور گرجا گھروں میں جانے والوں کو جامہ تلاشی کے بعد اندر جانے کی اجازت دی جا رہی ہے۔ مسیحی برادری کے افراد قبرستانوں میں جا کر اپنے عزیز و اقارب کی قبروں پرپھول بھی چڑھا رہے ہیں۔

کراچی میں ایسٹرکی مرکزی تقریب ٹرینی ٹی کیتھڈرل چرچ میں ہوئی جہاں چرچ کے فادر ہاتھوں شمعیں اٹھائے گرجا گھرمیں جلوس کی شکل میں داخل ہوئے۔ لاہورمیں سینٹ اینتھنی چرچ میں خصوصی تقریب کا اہتمام کیا گیا جہاں ملک و قوم کی سلامتی کے لئے خصوصی دعائیں کی گئیں سخت حفاظتی انتظامات کیے گئے۔

ڈی آئی جی آپریشنزلاہورکے مطابق تمام ایس پیز، ڈی ایس پیز اور ایس ایچ اوز ڈیوڈٹی پرحاضر ہیں اور گرجا گھروں کے اطراف میں ایلیٹ ، پیرو اور ڈالفن فورس کی پٹرولنگ کرتی رہے گی۔