سری لنکا میں بھی ’نالائق‘ کرکٹرزکی چھٹی کا مطالبہ

کپتان انجیلو میتھیوز کی ساتھیوں کو بچانے کیلیے شائقین اور حکام کو ’’ صبر ‘‘ کی تلقین فوٹو: اے ایف پی/فائل

---

سری لنکا میں بھی 'نالائق' کھلاڑیوں کو فارغ کرنے کا مطالبہ سامنے آگیا، ورلڈ ٹوئنٹی 20 میں دفاعی مہم کے شرمناک اختتام پر مقامی میڈیا بھی بھڑک اٹھا، ٹیم سلیکشن کو خاص طور پر تنقید کا نشانہ بنایا جارہا ہے۔

دوسری جانب کپتان انجیلو میتھیوزنے ساتھیوں کو بچانے کیلیے شائقین اور حکام سے 'صبر' کی درخواست کردی، وہ کہتے ہیں کہ اسی ٹیم کو سیٹ ہونے کیلیے وقت دیا جانا چاہیے۔ تفصیلات کے مطابق ورلڈ ٹوئنٹی 20 میں سری لنکن ٹیم انگلینڈ کے ہاتھوں شکست کے بعد ٹائٹل کے دفاع میں ناکام ہوگئی جوکہ اس نے دو برس قبل بنگلہ دیش میں جیتا تھا۔ اب اس کا پیر کے روزپروٹیز سے رسمی مقابلہ ہوناباقی ہے۔

ایونٹ میں شرمناک مہم کی وجہ سے سری لنکا میں بھی نالائق کھلاڑیوں کو فارغ کرنے کا مطالبہ زور پکڑنے لگا ہے، میڈیا نے خاص طور پر سلیکشن کو تنقید کا نشانہ بنایا ہے، ایونٹ کے آغاز سے قبل سلیکشن کمیٹی کو فارغ کردیا گیا تھا جبکہ ابھی ٹورنامنٹ شروع بھی نہیں ہوا تھا کہ لسیتھ مالنگا نے انجری کو بنیاد بناتے ہوئے کپتانی سے دستبردار ہونے کا اعلان کردیا تھا۔ سنڈے ٹائم نے لکھا کہ کہیں بھی ایسا نہیں ہوتا کہ ٹیم کی روانگی سے قبل ہی اسکواڈ میں تبدیلی کرنا پڑے، نالائق کھلاڑیوں کو فارغ کرنے کا وقت آگیا ہے۔

اگر یہی ٹیم برقرار رہی تو پھر انٹرنیشنل لیول پر سری لنکن کرکٹ کا وجود ہی خطرے میں پڑ جائے گا۔ دوسری جانب کپتان انجیلو میتھیوز نے خراب کارکردگی پر مایوسی تو ظاہر کی مگر سیٹ ہونے کیلیے مزید وقت دینے کی درخواست بھی کی ہے۔ وہ کہتے ہیں کہ ہمارے لیے گذشتہ چند ماہ کافی مایوس کن رہے ہیں، ہم نے اپنے شائقین اور ہموطنوں کو مایوس کیا، ہم نے اچھی کرکٹ نہیں کھیلی جس پر کافی مایوس ہیں، اب ہم صرف یہ کرسکتے ہیں کہ موجودہ کمبی نیشن کے ساتھ کھڑے رہیں اور ٹیم میں بہت زیادہ تبدیلیوں سے گریز کریں، 20 کھلاڑیوں کا انتخاب کریں اور انھیں اپنی جگہ بنانے کیلیے 6 ماہ کا وقت دیں۔

صلاحیتوں کے اظہار کیلیے حوصلہ افزائی کرنے کے بعد دیکھیں کہ پرفارمنس کے لحاظ سے کیا نتیجہ برآمد ہوتا ہے۔ دریں اثنا سری لنکا کے صدر نے امید ظاہر کی کہ ان کی ٹیم اگلی مرتبہ مضبوط کم بیک کرے گی۔