وی بوک خراب پاکستان کی بیرونی تجارت معطل

دنیا بھر میں خودکار سسٹمز کا متبادل نظام ہوتا ہے لیکن پاکستان کسٹمز کے پاس وی بوک کا کوئی متبادل نہیں،ندیم کامل

Ehtisham Mufti April 10, 2016

دنیا بھر میں خودکار سسٹمز کا متبادل نظام ہوتا ہے لیکن پاکستان کسٹمز کے پاس وی بوک کا کوئی متبادل نہیں،ندیم کامل فوٹو: آن لائن/فائل

پاکستان کسٹمز کے خودکارکلیئرنس سسٹم ''وی بوک'' میں خرابی کے باعث ہفتہ کی صبح سے درآمدی وبرآمدی سرگرمیاں معطل ہوگئیں۔

باخبرذرائع نے ''ایکسپریس'' کو بتایا کہ وی بوک کلیئرنس سسٹم میں درآمدات وبرآمدات سے متعلقہ دستاویزات لوڈ نہیں ہورہیں اور جب تک متعلقہ دستاویزات سسٹم میں لوڈ نہیں ہونگی اس وقت تک کنسائمنٹس کی کسٹمز ایگزامنیشن اور شپمنٹ رکی رہیں گی۔ ذرائع نے بتایا کہ وی بوک کلیئرنس سسٹم میں خرابی کے باعث ہفتہ کوکراچی اور پورٹ قاسم کی بندرگاہوں پر 1200 سے زائد درآمدی وبرآمدی کنٹینرز کی کسٹم کلیئرنس نہ ہو سکی جن میں تقریباً 500 برآمدی کنسائمنٹس شامل ہیں، ان میں چاول، ٹیکسٹائل، ریڈی میڈگارمنٹس ودیگرمصنوعات شامل ہیں۔

کراچی کسٹم ایجنٹس ایسوسی ایشن کے جنرل سیکریٹری ندیم کامل نے بتایا کہ وی بوک کلیئرنس سسٹم میں جمعہ کی شام سے ہی خرابی آنا شروع ہوگئی تھی جسے ہفتہ کی شب تک ٹھیک نہیں کیا جاسکا اور اس وجہ سے بیرونی تجارت معطل ہوگئی ہے۔ انہوں نے بتایا کہ وی بوک میں خرابی کے سبب پورٹ قاسم بندرگاہ پر 600 جبکہ کراچی بندرگاہ پر 800 کنٹینرز کی کسٹمزایگزامنیشن نہیں ہو سکی یعنی برآمدی کنٹینرز متعلقہ بحری جہازوں پر لوڈ نہیں ہوسکے اور درآمدی کنٹینرز کی کسٹمزکلیئرنس بھی نہیں ہوسکی۔

ندیم کامل نے بتایا کہ دنیا بھر میں خودکار سسٹمز کا متبادل نظام ہوتا ہے لیکن پاکستان کسٹمز کے پاس وی بوک کا کوئی متبادل نہیں، یہی وجہ ہے کہ خودکارکلیئرنس سسٹم میں خرابی کا خمیازہ متعلقہ درآمدوبرآمدکنندگان کو بھگتنا پڑتا ہے، وی بوک میں خرابی کے سبب متعدد برآمدی شپمنٹس بروقت نہ ہونے کی وجہ سے آرڈرز منسوخ ہونے کے خطرات ہیں، اسی طرح سے درآمدکنندگان کو ڈیمریج وڈیٹنشن چارجز کی مد میں اضافی اخراجات برداشت کرنا پڑیں گے۔ اطلاعات کے مطابق رات گئے وی بوک سسٹم خرابی دورکرکے بحال کردیا گیا۔