پانامہ لیکس گرینڈ اپوزیشن الائنس کیلیے پھر رابطے شروع

اپوزیشن حکومت کے خلاف ملک گیر احتجاجی تحریک شروع کرنے پرمشاورت کر رہی ہے

عامر خان April 10, 2016

اپوزیشن حکومت کے خلاف ملک گیر احتجاجی تحریک شروع کرنے پرمشاورت کر رہی ہے۔ فوٹو: فائل

پانامہ لیکس اسکینڈل کے معاملے پر اپوزیشن جماعتوں نے حکومت کے خلاف احتجاجی تحریک شروع کرنے کے لیے گرینڈ الائنس کی تشکیل کے حوالے سے دوبارہ رابطے کرنا شروع کردیے ہیں۔

اپوزیشن اس معاملے پر حکومت کے خلاف ملک گیر احتجاجی تحریک شروع کرنے پر مشاورت کر رہی ہے۔گرینڈ الائنس بنانے کے بعد حکومت کے خلاف احتجاجی دھرنوں اورمظاہروں کااعلان کیا جائے گا۔ذرائع نے بتایا کہ پانامہ لیکس کے معاملے پر اپوزیشن جماعتوں نے حکومت کے خلاف صف بندی کرناشروع کردی ہے، پی ٹی آئی کے اہم رہنما پیپلز پارٹی اور جماعت اسلامی سے رابطے میں ہیں۔

قومی اسمبلی میں اپوزیشن لیڈرخورشیدشاہ کوپی ٹی آئی کی قیادت کی جانب سے اہم پیغام بھیج دیاگیا ہے۔ الائنس کے قیام پر اتفاق رائے کے بعدعوامی تحریک، مسلم لیگ (ق) اور دیگراپوزیشن جماعتوں سے بھی رابطہ کیاجائے گا،ان رابطوں میں تینوں جماعتوں نے اس بات پر اتفاق کیاہے کہ اگر حکومت پانامہ لیکس کے معاملے پرسپریم کورٹ کے تحت عدالتی کمیشن کے قیام پر مذاکرات کرتی ہے توپھر بات چیت کی جائے گی ورنہ حکومت سے مذاکرات نہیں ہوںگے۔