مسائل پر قابو پانے کے لیے متحد ہونا ہوگا کمشنر میرپور خاص

قومی ترقی کیلیے پائیدار اور دیرپا امن اشد ضروری ہے، ہمیں موجودہ حالات میں درپیش مسائل اور مشکلات پر قابو پانے کیلیے اتحاد اور یکجہتی کو فروغ دینا ہو گا۔


ان خیالات کا اظہار کمشنر میرپورخاص غلام حسین میمن نے فریضہ حج کی ادائیگی سے واپسی پر انجمن ہلال احمر سندھ کے وائس چیئرمین رئیس احمد خان کی استقبالیہ تقریب سے خطاب کرتے ہوئے کیا۔

انہوں نے کہا کہ مثبت سوچ اور انداز فکر سے معاشرے میں افراتفری اور انتشار کو ختم کیا جا سکتا ہے۔ تقریب میں ڈپٹی کمشنر میرپورخاص ندیم الرحمان، ڈپٹی کمشنر ٹنڈوالہیار سمیت این جی اوز کے ممبران اور معززین کی بڑی تعداد نے شرکت کی، بعد ازاں کمشنر کو شرکاء نے اجرک کے تحائف پیش کیے۔