کترینہ تعلقات کی بحالی کے لیے تیار رنبیر کا صاف انکار

اداکارہ کترینہ کیف کو کپور فیملی کے واٹس ایپ گروپ سے خارج کردیا گیا ہے۔ فوٹو:فائل

---

بالی ووڈ کی باربی ڈول کترینہ کیف اوررنبیر کپور کے درمیان قربتوں اورعلیحدگی کی خبریں میڈیا کی زینت بنتی ہی رہی ہیں جہاں اب اداکارہ کی جانب سے ایک بار پھر اختلافات ختم کرکے جڑنے کی بات کی گئی ہے تو رنبیر کپور نے انہیں صاف صاف انکار کردیا ہے۔

بھارتی میڈیا رپورٹس کے مطابق ممبئی میں کترینہ کیف اور رنبیر کپور کا ایک پارٹی میں ٹاکرا ہوگیا۔ دونوں نے رسمی علیک سلیک کی تو کترینہ نے موقع غنیمت جان پراپنے دل کی بات رنبیر کے سامنے رکھ دی، باربی ڈول نے چاکلیٹی ہیرو کو اپنی محبت کا یقین دلانے کی بھرپور کوشش کی کہ شائد ان کے ہیرو کا دل پگھل جائے اوریہ جوڑا ایک مرتبہ پھرہنسی خوشی اپنی اننگز کا دوبارہ سے آغاز وہیں سے کریں جہاں سے ٹوٹا تھا لیکن شائد کترینہ کیف کے جذبات میں کچھ کمی تھی یا رنبیر کا غصہ زیادہ تھا کہ اس نے بالی ووڈ کی اس سپر اسٹار کی پیشکش رد کردی۔

رنبیر نے کترینہ کو صاٖف صاف ہی کہہ دیا کہ اب بہت دیر ہوچکی ہے کیونکہ تعلق جب روگ بن جائے تو اسے چھوڑنا ہی بہتر ہوتا ہے اورزندگی کا سفر تھمتا نہیں، اس لئے کترینہ آگے دیکھے اورماضی کی باتیں بھول جائیں، رنبیر کی باتیں سن کر کترینہ کا تو منہ ہی اتر گیا اور جب تک پارٹی میں رہی ان کے چہرے سے رد کئے جانے کا اثر ساف ظاہر تھا۔

واضح رہے کہ دونوں اداکاروں کی جانب سے گہری قربتوں کے بعد علیحدگی کا باضابطہ اعلان نہیں کیا گیا ہے جب کہ اخلافات کے بعد اب اداکارہ کترینہ کیف کو کپور فیملی کے واٹس ایپ گروپ سے خارج کردیا گیا ہے۔