ہریتھک روشن کی اکشے کمار سے فلم کی نمائش کی تاریخ آگے بڑھانے کی درخواست

ہریتھک روشن کی فلم’’موہن جودڑو‘‘ اور اکشے کمار کی فلم’’رستم‘‘ ایک ساتھ نمائش کے لیے پیش کی جائیں گی، فوٹو:فائل

---

بالی ووڈ کے ایکشن ہیرو ہریتھک روشن نے خطروں کے کھلاڑی اکشے کمار سے ان کی فلم کی نمائش آگے بڑھانے کی درخواست کردی ہے۔

بالی ووڈ اداکاروں ہریتھک روشن اور اکشے کمار فلم نگری کے صف اول کے اداکار ہیں جن کی فلمیں باکس آفس پر کروڑوں کا بزنس کرتی ہیں جب کہ دونوں اداکاروں کی فلمیں رواں سال ایک ہی تاریخ کو نمائش کے لیے پیش کی جائیں گی جس پر اداکار ہریتھک روشن پریشان ہیں اور اپنی پریشانی دور کرنے کے لیے انہوں نے خطروں کے کھلاڑی کی فلم کی نمائش کو آگے بڑھانے کی کوششیں شروع کردی ہیں۔

بالی ووڈ اسٹار ہریتھک روشن کی نئی آنے والی فلم ''موہن جودڑو'' اور اکشے کمار کی فلم ''رستم'' ایک ساتھ ریلیز کی جائیں گی جس کے بعد دونوں اداکاروں کی فلموں کے درمیان باکس آفس پر سخت مقابلے کی توقع کی جارہی ہے جس پر اداکار ہریتھک روشن نے شدید پریشانی کا اظہار کیا ہے جب کہ اداکار ہریتھک روشن نے اکشے کمار سے ان کی فلم کی نمائش کی تاریخ بڑھانے کی درخواست کی ہے تاہم اکشے کمار نے فلم کی نمائش کی تاریخ بڑھانے کا کوئی فیصلہ نہیں کیا ہے۔

واضح رہے کہ اداکار ہریتھک روشن کی فلم''موہن جودڑو'' اور اکشے کمار کی فلم''رستم'' 12 اگست کو نمائش کے لیے پیش کی جائے گی۔