پاناما لیکس پراسحاق ڈار کو اپوزیشن کے موقف سے آگاہ کردیا خورشید شاہ

حکومت پاناما لیکس پرچیف جسٹس کی سربراہی میں کمیشن سے متعلق مشاورت مکمل کرکے فیصلے سے آگاہ کرے گی،اپوزیشن لیڈر

ویب ڈیسک April 20, 2016

حکومت پاناما لیکس پرچیف جسٹس کی سربراہی میں کمیشن سے متعلق مشاورت مکمل کرکے فیصلے سے آگاہ کرے گی،اپوزیشن لیڈر۔ فوٹو: فائل

SINGAPORE: قومی اسمبلی میں قائدحزب اختلاف سید خورشید شاہ کا کہنا ہے کہ پاناما لیکس کے معاملے پر وفاقی وزیرخزانہ اسحاق ڈار کو اپوزیشن کے موقف سے آگاہ کردیا گیا ہے۔

ایکسپریس نیوز کے مطابق پانامالیکس پر تحقیقات کے معاملے پر مشاورت کے لئے خورشید شاہ اور اسحاق ڈار کے درمیان ٹیلیفونک گفتگو ہوئی جس کے بعد قائد حزب اختلاف کا کہنا تھا کہ وزیرخزانہ اسحاق ڈار کو پاناما لیکس پر تحقیقات کے لئے اپوزیشن کے موقف سے آگاہ کردیا اور انہیں کہا ہے کہ اپوزیشن چاہتی ہے کہ حکومت عدالتی کمیشن کے قیام کے لئے چیف جسٹس آف پاکستان کو خط لکھے اور فرانزک آڈیٹر اس کمیشن کے ٹی او آرز کی بنیاد ہو۔ انہوں نے کہا کہ اعزاز احسن کی عدم دستیابی کی وجہ سے اسحاق ڈار سے ملاقات کی بجائے ٹیلیفون پر بات ہوئی جب کہ اسحاق ڈار کا کہنا تھا کہ آپ کے کراچی والے بیان سے پریشان تھے۔

اپوزیشن لیڈر کا کہنا تھا کہ حکومت پاناما لیکس پر چیف جسٹس آف پاکستان کی سربراہی میں کمیشن سے متعلق اپنی مشاورت مکمل کرکے ہمیں فیصلے سے آگاہ کرے گی، اگر چیف جسٹس کمیشن کی سربراہی سے انکار کردیتے ہیں تو پارلیمانی کمیٹی تشکیل دی جائے گی۔