پی آئی اے کی نجکاری کا فریم ورک تیار کرنے پر کام شروع

حکومت نے نجکاری کمیشن کو غیر ملکی کنسلٹنٹ سے رابطوں کا ٹاسک دے دیا ہے

Numainda Express April 21, 2016

حکام کے مطابق قومی ایئر لائن کے اثاثوں کی ویلیو ایشن کے لیے فنانشل ایڈوائزر آئندہ ہفتے پاکستان آئیں گے :فوٹو: فائل

WANA: وفاقی حکومت نے پاکستان انٹرنیشنل ایئرلائن (پی آئی اے )کی نجکاری کے فریم ورک کی تیاری پر کام شروع کر دیا ہے تاہم قومی فضائی کمپنی کا انتظامی کنٹرول اپنے پاس رکھنے کا فیصلہ کیا ہے ۔

نجکاری کمیشن (پی سی) ذرائع کے مطابق پی آئی اے کے نجکاری فریم ورک کی تیاری کے لیے غیر ملکی کنسلٹنٹ کی خدمات حاصل کرنے کا فیصلہ کیا گیا ہے اور اس کے لیے حکومت نے نجکاری کمیشن کو غیر ملکی کنسلٹنٹ سے رابطوں کا ٹاسک دے دیا ہے جبکہ نجکاری کمیشن پی آئی اے کے معاملے پر فنانشل ایڈوائزرز سے بھی رابطے میں ہے۔

حکام کے مطابق قومی ایئر لائن کے اثاثوں کی ویلیو ایشن کے لیے فنانشل ایڈوائزر آئندہ ہفتے پاکستان آئیں گے، غیر ملکی کنسلٹنٹ اور فنانشل ایڈوائزر پی آئی اے کی نجکاری کے فریم ورک کی تیاری میں مدد کریں گے۔ حکام کا کہنا ہے کہ فنانشل ایڈوائزر کی رپورٹ کابینہ کی نجکاری کمیٹی کے سامنے پیش کی جائے گی، پی آئی اے کا انتظامی کنٹرول قومی فضائی کمپنی کے بورڈ آف ڈائریکٹرز کے پاس ہوگا، بورڈ میں تعیناتیاں حصص کی شرح پر ہوں گی۔