عامر خان اپنی نئی فلم میں موسیقار بنیں گے

عامر خان فلم میں اپنے کردار میں حقیقت کا رنگ بھرنے کے لیے میوزک کی کلاسز بھی لیں گے ، فوٹو:فائل

---

بالی ووڈ میں اپنے کردار میں ڈھل جانے کے حوالے سے شہرت رکھنے والے اداکار عامر خان اپنی نئی فلم میں موسیقار بنیں گے۔

بالی ووڈ سپر اسٹار عامر خان فلم نگری میں اپنے کردار میں حقیقت کا رنگ بھرنے کے حوالے سے شہرت رکھتے ہیں یہی وجہ ہے کہ فلموں میں اپنے کردار سے انصاف کرنے کے لیے اپنی جان کو بھی خطرے میں ڈال دیتے ہیں جب کہ وہ اپنی نئی والی فلم ''دنگل'' میں ریسلر کا کردار نبھائیں گے جس کے لیے اپنے وزن میں 25 کلو اضافہ کرلیا تھا تاہم اب اپنی ایک اور فلم میں ایک نئے انداز میں نظر آنے والے ہیں۔

میڈیا رپورٹس کے مطابق عامر خان اپنی نئی آنے والی فلم ''دنگل'' کی شوٹنگ میں مصروف ہیں جس کے بعد وہ اپنے سابق منیجرایڈویت چندن کی فلم ''سیکرٹ سپر اسٹار'' میں ںظر آئیں گے جس میں وہ میوزک کمپوزر کا کردار نبھائیں گے جب کہ فلم میں اپنے کردار میں حقیقت کا رنگ بھرنے کے لیے میوزک کی کلاسز لیں گے جس کے بعد فلم کی شوٹنگ رواں سال جون میں شروع کی جائے گی۔

واضح رہے کہ بالی ووڈ اداکار عامر خان کی فلم ''دنگل'' دسمبر میں ریلیز کی جائے گی۔