ویرات اور انوشکا میں پھر قربتیں بڑھنے لگیں

بالی ووڈ کی خوبرو اداکارہ انوشکا شرما اور بھارتی کرکٹر ویرات کوہلی کے درمیان اختلافات ختم ہوگئے ہیں جس کے بعد ایک بار پھر ویرات نے اداکارہ کو سماجی رابطوں کی ویب سائٹس ٹوئٹر اور انسٹاگرام پر فالو کرنا شروع کردیا ہے۔

بالی ووڈ اسٹار انوشکا شرما اور بھارتی کرکٹر ویرات کوہلی کے درمیان طویل عرصے سے معاشقہ رہا ہے تاہم گزشتہ دنوں دونوں میں اختلافات کے باعث دوریاں ہوگئی تھیں جس پر ویرات کوہلی نے سوشل میڈیا ویب سائٹس ٹوئٹر اور انسٹاگرام پر بھی اداکارہ کو فالو کرنا چھوڑدیا تھا تاہم اب دونوں کے تعلقات پر جمی برف پگھلنے کے بعد ایک بار پھر قربتیں بڑھنے لگی ہیں۔


میڈیا رپورٹس کے مطابق انوشکا شرما اورویرات کوہلی کے درمیان اختلافات ختم کرانے میں دبنگ اسٹار سلمان خان نے اہم کردار ادا کیا تھا جس کے بعد دونوں نے ممبئی کے ہوٹل میں یک ساتھ ڈنر بھی کیا تھا جب کہ دونوں اداکاروں کے تعلقات پرجمی برف پگھلنے کے بعد اب ایک بار پھر قربتیں بڑھنے لگی ہیں اور کرکٹر ویرات کوہلی نے اداکارہ کی سالگرہ کے موقع پر ایک بار پھر سماجی رابطوں کی ویب سائٹس ٹوئٹر اور انسٹاگرام پر انہیں ''فالو'' کرنا شروع کردیا ہے جس پر ایک بار پھر دونوں شخصیات میں اختلافات ختم ہونے کی خبریں گردش کرنے لگی ہیں۔

واضح رہے کہ بالی ووڈ اداکارہ انوشکا شرما اپنی نئی آنے والی فلم ''سلطان'' کی شوٹنگ میں مصروف ہیں جس میں وہ سلمان خان کے مدمقابل مرکزی کردار ادا کریں گی جب کہ فلم رواں سال عید الفطر کے موقع پر ریلیز کی جائے گی۔