زائدویلیوایشن کاسمیٹکس درآمدات 30 فیصدرہ گئیں

3ماہ میں درآمدی کاسمیٹکس50فیصدمہنگی،عام آدمی براہ راست متاثر

Ehtisham Mufti May 04, 2016

امپورٹرز کاایف بی آر سے زمینی حقائق کی بنیاد ویلیوایسسمنٹ کامطالبہ فوٹو: فائل

QUETTA: پاکستان کسٹمزکے ڈائریکٹوریٹ کسٹمز ویلیوایشن کی جانب سے درآمدی کاسمیٹک مصنوعات کی عالمی مارکیٹ سے دگنی قیمتوں پر ویلیو ایسسمنٹ کے باعث ان کی درآمدی سرگرمیاں 30 فیصد تک محدود ہوگئیں۔

ذرائع نے ''ایکسپریس'' کو بتایا کہ پاکستان میں برطانیہ، جرمنی، چین ، بھارت سمیت دیگر ممالک سے کاسمیٹک مصنوعات درآمد کی جاتی ہیں جن پر 20 فیصد کسٹم ڈیوٹی، 20 فیصد سیلز ٹیکس، 15 فیصد ریگولیٹری ڈیوٹی، 6 فیصد انکم ٹیکس اور 1فیصد ایڈیشنل ڈیوٹی عائد ہے، کاسمیٹک مصنوعات کی درآمدات سے ملک کو ریونیو کی خطیر وصولیاں ہوتی ہیں لیکن 3 ماہ سے ڈائریکٹوریٹ کسٹمز ویلیوایشن کی ویلیو ایسسمنٹ عالمی مارکیٹ سے مطابقت نہ رکھنے کے باعث درآمدکنندگان مضطرب ہیں۔

آل پاکستان کاسمیٹکس امپورٹرزاینڈ ٹریڈرز ایسوسی ایشن کے صدرعبدالرحیم نے بتایا کہ ڈائریکٹوریٹ کسٹمز ویلیوایشن کی جانب سے درآمدی کاسمیٹکس کی عالمی مارکیٹ سے دگنی قیمت پر ویلیو ایسسمنٹ کی جا رہی ہے اور اس ضمن میں ڈائریکٹوریٹ کی جانب سے 3 ماہ قبل ویلیوایشن رولنگ بھی جاری کی گئی ہے لیکن اس غیرحقیقت پسندانہ حکمت عملی کی وجہ سے نہ صرف کسٹمز ریونیو میں کمی ہورہی ہے بلکہ درآمدکنندگان کاسمیٹکس مصنوعات کے نئے درآمدی معاہدے کرنے سے گریز کررہے ہیں۔ انھوں نے بتایا کہ کسٹمز کے اس طرز عمل سے عام آدمی براہ راست متاثر ہورہا ہے اورگزشتہ 3 ماہ کے دوران درآمدی کاسمیٹکس مصنوعات کی قیمتوں میں تقریباً 50 فیصد کا اضافہ بھی ہوگیا ہے۔

انہوں نے کہا کہ ڈائریکٹوریٹ نے درآمدی کاسمیٹکس کے لیے ازخود برانڈز کی بنیاد پر اے، بی، سی اورڈی کیٹگریز بنالی ہیں اور ان کیٹگریز کی بنیاد پر ہائی ٹیرف پر کسٹمز ویلیوایشن کی جارہی ہے۔ انہوں نے چیئرمین ایف بی آر اور ممبرکسٹمز ایف بی آر سے مطالبہ کیا کہ خالصتاً ریونیو جنریشن کی پالیسی اختیار کرنے کے بجائے زمینی حقائق کی بنیاد ویلیوایسسمنٹ کرانے کے احکام جاری کریں تاکہ ملک کے ہرتجارتی شعبے کونہ صرف مساوی کاروباری ماحول میسر ہوسکے بلکہ کاروباری سرگرمیاں وسیع البنیاد ہونے سے ریونیو کے حجم میں بھی اضافہ ہوسکے۔