حصص مارکیٹ میں بیرونی سرمایہ کاری سے 35000پوائنٹس کی حد عبور

پاکستان کی ایم ایس سی آئی انڈیکس میں شمولیت کی اطلاعات اور غیرملکیوں کی بلیوچپس میں بڑھتی خریداری سرگرمیوں کے باعث پاکستان اسٹاک ایکس چینج میں بدھ کو بھی تیزی کا تسلسل قائم رہا جس سے انڈیکس کی35000 پوائنٹس کی نفسیاتی حد عبورہوگئی جبکہ حصص کی مالیت میں مزید72 ارب92 کروڑ72 لاکھ28 ہزار974 روپے کا اضافہ ہوگیا۔

ماہرین اسٹاک وتاجران کا کہنا تھا کہ غیرملکیوں کے تازہ سرمایہ کاری رحجان کو دیکھتے ہوئے سرمایہ کاری کے مقامی شعبوں بالخصوص مقامی انسٹی ٹیوشنز نے بھی اینگرو، لکی سیمنٹ اور بینکنگ سمیت دیگر شعبوں میں اپنی سرمایہ کاری بڑھائی جس سے مارکیٹ کا گراف بلندی کی جانب گامزن رہا اور تمام کاروباری دورانیے میں مارکیٹ مثبت زون میں رہی۔


تیزی کے باعث کاروبارکے اختتام پر کے ایس ای100 انڈیکس 420.26 پوائنٹس کے اضافے سے35317.56 ہوگیا جبکہ کے ایس ای30 انڈیکس 299.39 پوائنٹس بڑھ کر 20616.73 ، کے ایم آئی 30 انڈیکس 978.42 پوائنٹس کے اضافے سے 61485.17 اور کے ایم آئی آل شیئر انڈیکس 200.73 پوائنٹس بڑھ کر 16495.49 ہوگیا۔

کاروباری حجم منگل کی نسبت 41.21 فیصد زائد رہا اور مجموعی طور پر27 کروڑ92 لاکھ 66 ہزار230 حصص کے سودے ہوئے جبکہ کاروباری سرگرمیوں کا دائرہ کار386 کمپنیوں کے حصص تک محدود رہا جن میں218 کے بھاؤ میں اضافہ، 145 کے داموں میں کمی اور23 کی قیمتوں میں استحکام رہا۔