لیہ واقعہ دکان مالک کے چھوٹے بھائی کا مٹھائی میں زہر ملانے کا اعتراف

بڑے بھائی کے تشدد سے تنگ آکر غصے کی حالت میں مٹھائی میں زہر ملایا، ملزم کا اعترافی بیان

ویب ڈیسک May 06, 2016

بڑے بھائی کے تشدد سے تنگ آکر غصے کی حالت میں مٹھائی میں زہر ملایا، ملزم کا اعترافی بیان، اسکرین گریپ / ایکسپریس نیوز

MUMBAI: پولیس نے زہریلی مٹھائی سے اموات کا معمہ حل کرلیا جس کے تحت دکان مالک کے چھوٹے بھائی نے مٹھائی میں زہر ملانے کا اعتراف کرلیا۔

ایکسپریس نیوز کے مطابق پولیس 16 روز بعد لیہ میں زہریلی مٹھائی سے اموات کا معمہ حل کرنے میں کامیاب ہوگئی ہے اور ملزم نے بیان ریکارڈ کرانے کے دوران اپنے جرم کا اعتراف کرلیا ہے۔ پولیس کے مطابق دکان مالک طارق کے چھوٹے بھائی خالد نے مٹھائی میں زہر ملانے کا اعتراف کیا جس میں ملزم نے مجسٹریٹ کے سامنے بیان دیتے ہوئے بتایا کہ اس کا بڑا بھائی اسے آئے روز شدید تشدد کا نشانہ بناتا تھا اور گھر سے نکال دیتا تھا جس پر تنگ آکر غصے کی حالت میں مٹھائی میں زہر ملایا جب کہ زہر کی بوتل ملک غفار نے دکان میں رکھی۔

واضح رہے کہ لیہ میں زہریلی مٹھائی کھانے سے 30 سے زائد افراد جان کی بازی ہار گئے تھے جب کہ متعدد افراد کی حالت غیر ہوگئی تھی جس پر پولیس نے دکان مالک اور اس کے چھوٹے بھائی سمیت دیگر افراد کو بھی حراست میں لیا تھا۔