کوئی کارکردگی سے خوش نہیں توبرطرف کردےاستعفیٰ نہیں دونگا چیئرمین نیب

چئیرمین نیب ایڈمرل(ر) فصیح الدین بخاری نے کہا ہے کہ اگر کوئی میری کارکردگی سے خوش نہیں تو مجھے برطرف کردے لیکن کسی صورت استعفیٰ نہیں دوں گا۔


اسلام آباد میں پریس کانفرنس کے دوران چیئرمین نیب کا کہنا تھا کہ ملک میں ریگولیٹری ادارے ناکام ہوگئے ہیں جس کے باعث کرپشن بڑھ رہی ہے۔ کرپشن نے ملک کے ہر شعبے کو اپنے شکنجے میں جکڑ رکھا ہے۔ انہوں نے کہا کہ کرپشن کے خلاف کارروائی کے باوجود ہر نئے روز اس میں مسلسل اضافہ ہورہا ہے لیکن وہ اپنی ذمہ داریوں سے انحراف نہیں کریں گے۔

فصیح الدین بخاری کا کہنا تھا کہ نیب نے اپنی حکمت عملی پر نظرثانی کی ہے جس کے تحت بدعنوانی کے اسباب کے خاتمے کو اولین ترجیح دی جارہی ہے۔ انہوں نے کہا کہ تمام متعلقہ اداروں اور عہدیداروں کے تعاون سے اپنی کوششیں جاری رکھوں گا۔